“Туймаада” ҮХАПХ тыа хаһаайыстыбатын производственнай эбийиэктэрин тутуу үлэтин сүрүннүүрүнэн, тыа сирин сайыннарыыга оруола сүҥкэн. Биллэрин курдук, ханна улахан тутуу ыытыллар – онно олох-дьаһах тигинии түһэр, дьон сүргэтэ көтөҕүллэр уонна үлэтэ күүһүрэр.
edersaas.ru
Хампаанньа быйыл аныгы технологиянан 120-лии ынах турар 6 улахан хотонун тутар былааннааҕын барытын тиһэҕэр тиэртэ. Ол курдук, Мэҥэ Хаҥалас улууһугар “Тумул”, Уус Алдаҥҥа “Танда”, Бүлүүгэ “I Күүлэт” производственнай кэпэрэтииптэргэ, Чурапчы Одьулуунугар “Комплекс” бааһынай хаһаайыстыбаҕа, Аммаҕа “Илгэ” уонна Хаҥаласка “Бөртө сылгы собуота” ХЭУо-ларга тутан киллэрдэ. Итилэргэ барытыгар 215 мөл. 823,18 тыһ. солк. суумалаах үлэ ыытылынна.
Уус Алдаҥҥа «Танда» ТХПК сэбиэскэй былаас эстиэҕиттэн дьэ саҥа хотоннонно
Киһи үөрэрэ баар, 2017 сылга хотон туттарбыт хаһаайыстыбалар РФ Тыатын хаһаайыстыбатын министиэристибэтин бэрэбиэркэтин ааһаннар, тутуу ороскуотун судаарыстыбаттан толуйтарар кыахха киирдилэр. Тоҕо диэтэххэ, “Туймаада” хампаанньа исписэлиистэрэ хаһаайыстыбаларга федеральнай субсидияҕа ирдэниллэр докумуону сүбэлээн, оҥорон биэрэллэр уонна техническэй надзор үлэтин ыыталлар. Өрөспүүбүлүкэ буоллун, федеральнай буоллун, бүддьүөт үбэ аналынан уонна сөптөөхтүк туттуллара кытаанахтык хонтуруолланар буолла. Онон уу тэстибэт гына оҥороруҥ эрэйиллэр. Быйыл Амма уонна Мэҥэ Хаҥалас улуустарыгар икки улахан хаһаайыстыба маннык бырайыагынан хотон туттан бараннар, федеральнай субсидияҕа кыайан хапсыбатахтара – атыттарга үөрэх буолуох тустаах. Кэлэр сылга уонча хаһаайыстыба хотон туттараары докумуон сырсыытыгар сылдьар сураҕа иһиллэр.
Манна сыһыаран эттэххэ, “Туймаада” хампаанньа сакааһынан “Якутагропромпроект” ААУо бырайыактааччыларын бөлөҕө 120 ыанньык ынахха үүт блоктаах гына оҥорбут бырайыага (Амма Абаҕатыгар Василий Тимофеев салайааччылаах “Илгэ” ХЭУо туттарбыт холобуругар) быйыл Изыскателлэр уонна бырайыактааччылар национальнай холбоһуктарын идэлээх куонкуруһугар 2-с миэстэни ылан, НОПРИЗ каталогар киллэриллибитин туһунан үөрүүлээх сонун Москваттан көтөн кэллэ. Онон “Туймаада хотоно” биһиги уһун, тымныы кыһыннаах, тыйыс усулуобуйалаах дойдубутугар саамай дьүөрэлээх тутуу буолара өссө төгүл бигэргэннэ. Инникитин типовой бырайыак быһыытынан бигэргэннэҕинэ, хаһаайыстыбалар экспертизаны ааһалларыгар быдан чэпчэки буолуоҕа саарбахтаммат.
А.Г.Васильев Үөһээ Бүлүүгэ «Чолбон» кэпэрэтиип саҥалыы сөргүтүллүбүт собуотугар
“Туймаада” ҮХАПХ тыа хаһаайыстыбатын табаарын оҥорооччулары өйөөн, 2017 сылга оҕуруот аһын уонна хортуоппуйу соҕотуопкалыырга, ынах арыытын, эти атыылаһыыны тэрийэргэ, бурдук уонна ынах сүөһү атыылаһар хаһаайыстыбаларга 216,82 мөл. солк., ол иһигэр АПК производственнай эбийиэктэрин тутууга 67,33 мөл. солк., иэс биэрдэ. Ону таһынан кэтэх дьиэ туттар 165 ыалга 93,3 мөл. солк. харчыны уһун болдьоххо (10 сылга диэри) бырыһыана суох иэс биэрэн өйөөтө. Көмө өссө көбүччү буолуоҕун төннөрүүтэ бытаан буолан, атахтыыр. Кэлиҥҥи сылларга сыл түмүгүнэн иэһи төлөһүү 80-85 бырыһыан таһымыгар сылдьар.
“Туймаада” ҮХАПХ генеральнай дириэктэрэ, Россия Аграрнай партиятын Саха сиринээҕи салаатын бэрэссэдээтэлэ Александр Васильев: “Күндү тыам сирин олохтоохторо, Эһигини саҥа 2018 сылынан итиитик-истиҥник эҕэрдэлиибин! Үлэлээбиккит үллэн истин, туппуккут торолуйа турдун! Чэгиэн, дьоллоох, түмсүүлээх буолуҥ!” – диэн алгыстаах эҕэрдэтин тириэрдэр.
Василий НИКИФОРОВ, «Саха сирэ» хаһыат, edersaas.ru