Саха сирин баһылыга “Туймаада” олимпиада кыттыылаахтарын кытта көрүстэ
Саха сирин баһылыга Айсен Николаев от ыйын 12 күнүгэр СӨ Наукаларын аччыгый академиятыгар XXVI норуоттар икки ардыларынааҕы үөрэнээччилэр математикаҕа, физикаҕа, химияҕа уонна информатикаҕа олимпиадаларын кыттыылаахтарын кытта көрүстэ. Кини үөрэнээччилэргэ Үөһээ Бүлүү оскуолатыгар уонна МГУ-га хайдах үөрэммитин кэпсээтэ уонна физикаҕа эксперименниир садаачаны суоттаата.
Санатан эттэххэ, “Туймаада” олимпиадатыгар Саха сириттэн, Бурятияттан, Москва уобалаһыттан, Новосибирскайтан, ону тэҥэ тас дойдулартан — Болгарияттан, Ирантан, Казахстантан, Румынияттан, Сингапуртан, Таджикистантан 154 үөрэнээччи кытынна.
Айсен Николаев олимпиада кыттыылаахтарын эҕрдэлээһинигэр кинини естественнэй наукаларга сыһыарбыт учууталлара Виктор Филиппович Потапов уонна Георгий Григорьевич Захаров кытыннылар.
М.В.Ломоносов аатынан Москватааҕы судаарыстыбаннай университет физическэй факультетын бүтэрбит Айсен Николаев естественнэй-научнай үөрэхтээһини үрдүктүк сыаналыырын туһунан эппитэ.
Кини оҕолор “Туймаада” норуоттар икки ардыларынааҕы үөрэнээччилэр олимпиадаларыгар кыттан чопчу ситиһиилэммиттэрин бэлиэтээтэ. Норуоттар икки ардыларынааҕы олимпиада Арассыыйа эрэгийиэннэриттэн эрэ буолбакка, тас дойду бастыҥ үөрэнээччилэрин түмэр. “Науканы уонна үөрэҕи таптааҥ диэн баҕа санаабын тириэрдэбин, тоҕо диэтэххэ, күннэтэ бэйэлэрин билиилэрин хаҥатар, саҥа биридимиэттэргэ уонна саҥа сыһыаҥҥа үөрэнэр дьон олоххо элбэҕи ситиһэллэр. Киһи үйэтин тухары үөрэниэхтээх дии саныыбын. Эһиги саамай үөрэнэр сааскытыгар сылдьаҕыт. Саҥаны билии – бу мэлдьи кэрэ”, — диэтэ Айсен Николаев норуоттар икки ардыларынааҕы олимпиада кыттыылаахтарыгар туһаайан.
Көрсүһүү кэмигэр өрөспүүбүлүкэ баһылыга үөрэнээччилэр ыйытыыларыгар хоруйдаата. Үөрэнээччилэр Арассыыйа бөдөҥ эрэгийиэнин баһылыгын ситиһиилэрин, кини аныгы технологияларга сыһыанын, ол иһигэр искусственнай интеллеги олоххо киллэриини уонна Саха сиригэр дьоҕурдаах оҕолору өйөөһүн туһунан туоһуластылар.
Айсен Николаев Өрөспүүбүлүкэтээҕи лицей үөрэнээччитэ Стас Новиковы кытта физикаҕа Гук сокуонун дакаастыыр эксперименниир садаачаны суоттааһыҥҥа кыттыста.
СИА.