Туйаара Слепцова: «Ил Дархан хамсыгы кыайыахпыт диэбитэ сүргэни көтөҕөр»

Ааптар: 
Бөлөххө киир:

Аллайыаха киин балыыһатын кылаабынай бырааһа Т.Н.Слепцова Ил Дархан анал этиитин хайдах сыаналаата? 

Туйаара Николаевна Слепцова, Аллайыаха оройуонунааҕы киин балыыһа кылаабынай бырааһа:

— Хоту сытар Аллайыаха улууһун олохтоохторо төһө да ыраах олордорбут, өрөспүүбүлүкэбит Ил Дарханын Айсен Николаев СӨ Судаарыстыбаннай Мунньаҕын (Ил Түмэн) дьокутааттарыгар Анал этиитин иһиттибит. Мин эмчит буоларбынан Айсен Николаев эмчиттэргэ сыһыаннаах этиитин болҕойон иһиттим. Ил Дархан бэйэтин этиитин аан дойдуга суоһаабыт хамсыктан саҕалаабыта түбэһиэхчэ буолбатах. Кини манан бу дьаҥы бохсууга өрөспүүбүлүкэҕэ улахан суолта уурулларын көрдөрдө. Өрөспүүбүлүкэ эмчиттэрэ ыарахан дьаҥы тохтотууга күүскэ үлэлииллэрин холобурдаан эппитэ үчүгэй. Мантан күнүстэри-түүннэри ыарыһахтары тыыннаах хаалларар туһугар сыралаһар бары эмчиттэр санаабыт өрө көтөҕүлүннэ. “Хамсыгы кыайыахпыт! Бу биһиги барыбыт уопсай кыайыыта буолуоҕа”, — диэбитэ Саха сирин олохтоохторугар улахан эрэли үөскэттэ дии саныыбын. Кэлэр сылы доруобуйа сылынан биллэрдэ. Онон доруобуйа харыстабылын эйгэтигэр күүстээх үлэ кэтэһэр.

Ил Дархаммыт Айсен Сергеевич бэйэтин туһаайыытыгар Арктиканы олох ойуччу тутта. Оптоволокно Өлөөҥҥө тиийбитин холобурдаата. Кистээбэккэ эттэххэ, ымсыырдыбыт. Уонна Жатай Арассыыйа үрдүнэн хаарбах дьиэтэ суох буолбута улахан  үлэттэн таҕыстаҕа, улахан ситиһии дии саныыбын. Анал этиитигэр Аллайыахаҕа улуус уонна Чокуурдаах бөһүөлэгин дьаһалталара холбоспуттарын, ол түмүгэр хас да мөлүйүөн солкуобай кэмчилээһин тахсыбытын эттэ.  Холбоһуу түмүгэ көстүөҕэ диэтэ. Кырдьык даҕаны, оннук. Саҥа уларыйыылар түмүктээх буолуохтара диэн эрэниэххэ.

Бэлэмнээтэ Женни Стрюкова

Хаартыскаҕа: Т.Н.Слепцова

+1
0
+1
0
+1
0
+1
0
+1
0
+1
0
+1
0