«Саха» НКИХ Москватааҕы салаатын салайааччытынан Туйаара Константинова ананна
Кулун тутар 13 күнүгэр дойду бэрэсидьиэнин иһинэн СӨ бастайааннай бэрэстэбиитэлэ Андрей Федотов «Саха» НКИХ Москватааҕы салаатын саҥа салайааччытын Туйаара Константинованы билиһиннэрдэ.
edersaas.ru
Бу иннинэ «Саха» НКИХ Москватааҕы салаатын 23 сыл тухары салайан кэлбит Наталья Сазоноваҕа өр кэмнээх таһаарыылаах үлэтин иһин Андрей Федотов махтанан туран, «Гражданскай килбиэн» бэлиэтин, «Саха» НКИХ дириэктэрэ Олег Марков тэрилтэ көмүс бэлиэтин туттардылар. Ону таһынан, биллиилээх суруналыыһы Татьяна Черемкинаны эмиэ наҕараадалаатылар.
Туйаара Константинова СГУ суруналыыстыка салаатын бүтэрбитэ, үлэтин «Республика бүттүүнэ» хаһыаттан саҕалаабыта. 2009-2011 сылларга «Биир ньыгыл Арассыыйа» эрэгийиэннээҕи толорор кэмитиэтин салайааччытын солбуйааччытынан, аҕытаассыйалыыр үлэ отделын начаалынньыгынан үлэлээбитэ.
2011-2012 сылларга «Сахамедиакиин» дириэктэрин солбуйааччы.
2012-2017 сылларга Дьокуускай куорат дьаһалтатын информацияҕа, рекламаҕа уонна хонтуруолга сулууспатын дириэктэрэ.
2017 сылга «Сахамедиа» коммерческай сулууспатын салайааччыта.
2017-2018 сылларга Дьокуускай куорат дьаһалтатын общественноһы уонна сонуну киэҥник тарҕатар сириэстибэлэри кытта үлэҕэ департаменын салайааччыта.
Кэргэннээх, үс оҕолоох.
Марианна Тыртыкова, «Саха сирэ», edersaas.ru