Ааспыт сайын ойуур баһаардара күүскэ турбуттарыгар, ардаҕы ыҥырар анал ньыманы туһаныы улахан көдьүүстээҕин итэҕэппитэ. Бу туһунан ойуур баһаарын утары үлэни салайбыт СӨ Бырабыыталыстыбатын Бэрэссэдээтэлин 1-кы солбуйааччы Дмитрий Садовников суруналыыстары кытта көрсүһүүгэ кэпсээтэ. Кэлэр сылга бу ньыма хайаан да туһаныллыаҕа. Ан-26 («Циклон») диэн зондировщик-сөмөлүөт өрөспүүбүлүкэҕэ от ыйын 20 күнүн эргин кэлэн, үгүс улууска үлэлээбитэ.
Киин куорат олохтоохторо умна илик буолуохтаахтар, Дмитрий Садовников ол ураты сөмөлүөтүнэн көппүтүн кэнниттэн күүстээх ардах түспүтэ, сонно тута буруо хаптайбыта. Онуоха «Дим Димич тугу эрэ ойууннаата быһыылаах”, — диэн саҥалар-иҥэлэр иһиллибиттэрэ. Ол эрээри, Дмитрий Дмитриевич ол анал көтүүгэ «Веер» установка үлэтин кытта билсибитэ.
«Көрүөхпүт, билиэхпит, тугун-ханныгын. Ил Дархан Айсен Николаев сорудаҕынан, ити ньыманы үөрэтиэхпит. Тоҕо диэтэххэ, өрөспүүбүлүкэбитигэр бэйэбит авиа-хампаанньабыт көтөр аалыгар ардаҕы ыҥырар оборудованиены олордуохпут», — диэн Дмитрий Садовников ол анал аалынан көтүөхтээх күнүгэр иһитиннэрбитэ.
Соторутааҕыта туох түмүккэ кэлбиттэрин иһитиннэрдэ. «Бу сайын «Циклон» үлэтин билсэн баран, ойуур баһаарын билиигэ-көрүүгэ, ардаҕы ыҥырыыга чахчы абыраллаах тэрил эбит диэн итэҕэйдибит. Искусственнай ардаҕы оҥорууну, ыҥырыыны чинчийэр научнай киини кытта билсибитим, кинилэр биһиги сөмөлүөппүтүгэр анал тэрили туруоран биэрэргэ бэлэмнэр, – диэн Дмитрий Дмитриевич быһааран биэрдэ. — 2022 сылга ойуур баһаарыгар эмиэ ыксаллаах быһыы-майгы буолар түгэнигэр, Ил Дархан ити ньыманы туһанар туһунан сорудахтаабыта».
Дмитрий Садовников быһаарбытынан, установка аҥаардас баһаары эрэ умуруорууга буолбакка, тыа хаһаайыстыбатын үлэлэригэр, навигацияҕа, ону сэргэ, уолан эрэр сирдэри уунан толорууга туһаныллар кыахтаахтар.
«Светлинскэйдээҕи ГЭС-кэ уу аҕыйаабытынан сибээстээн, кэлэр сылга ууну ыыппаттара биллэр. Бүлүү өрүс уутун таһыма биллэрдик түһэрэ күүтүллэр. Онон кэлэр навигацияҕа ити өрүскэ ыарахаттары көрсөрбүт буолуо. Эһиилги сайын эмиэ кураан буолуохтаах. Дьэ манна искусственнай ардаҕы ыҥырар установкалаах сөмөлүөт улаханнык абырыаҕа дии саныыбыт», — диэн кини быһаарар.
«Полярные авиалинии» АХ пресс-сулууспата иһитиннэрбитинэн, атмосфернай технологияларга агентствота «Саг-26» диэн анал установканы хампаанньа сөмөлүөттэригэр бэрэбиэркэни ыыппыт. Бу тэрил былыты үөскэтэр сыалтан үрүҥ көмүстэээх йодиды халлааҥҥа ыһар. Атмосфернай технологияларга агентствотын исписэлиистэрэ 2022 сылга кэлэн, «Веер» оборудованиены туһанар өҥөнү оҥороллоругар кэпсэтии барбыт. Ону тэҥэ, СӨ Бырабыыталыстыбата «Полярные авиалинии» хампаанньа Ан-26 сөмөлүөтүгэр «Саг-26» установканы бэрэбиэркэлиир үлэни ыытарга сөптөөх көмөнү оҥоруоҕа.
edersaas.ru