Трутнев кыраныыссалары уҥуордуур ТОР-дары тэрийэргэ этии киллэрдэ

Ааптар: 
Бөлөххө киир:

Илиҥҥи экономическай пуорум чэрчитинэн  Арассыыйа Президенин боломуочуйалаах бэрэстэбиитэлэ, вице-премьер Юрий Трутнев «Элбэх полюстаах аан дойдуга аһаҕас аартык. Уһук Илин дойдулар икки ардыларынааҕы сыһыаннаһыылар саҥа тутулларыгар» («Ворота в многополярный мир. Дальний Восток в новой архитектуре международных отношений») диэн сессияҕа кыттыыны ылла.

«Валдай» дискуссионнай кулууп иилээн-саҕалаан ыыппыт түһүлгэтигэр дойдулар икки ардыларынааҕы бииргэ үлэлээһин, билиҥҥи экэнэмиичэскэй уонна бэлитиичэскэй быһыы-майгы туһунан кэпсэтии буолла.

Дойдубут илиҥҥи хайысхатын сайдыыта өссө 2013 сыллаахха Владимир Путин быһаччы дьаһалынан саҕаламмыта. 3 тыһ. тахса инвестиционнай бырайыак үлэтин саҕалаабыта, 3 трлн солк чааһынай хапытаал инвестиция буолан киирбитэ.

Юрий Трутнев тоһоҕолоон эппитинэн, билигин Уһук Илин күүскэ сайдарыгар бары күүс ууруллуохтаах. Бастатан туран, тимир суола сайдыахтаах, онон таһаҕаһыы таһыы хас да бүк элбиэхтээх. Иккис хайысха – тырааныспар көрүдүөрдэрэ, ол иһигэр Хотугу муора суола.

Трутнев этэринэн, Арассыыйа ыытар Илиҥҥи экономическай пуорумугар барыта 68 дойду кыттыыны ылар. Олор истэригэр – Австралия, Австрия, Улуу Британия, АХШ, Германия, Франция, Швейцария, Япония, Ирландия, Италия. “Ол аата, аан дойду тутула төһө да уларыйдар, араас судаарыстыбалар бэйэ-бэйэлэрин кытта бииргэ үлэлэһэргэ интэриэстээхтэр. Бэйэ-бэйэбитин хардарыта өйдүү, өйдөһө сатыыбыт», – диэтэ кини.

Маны сэргэ, вице-премьер кыраныыссалары уҥуордуур ТОР-дары тэрийэргэ этии киллэрдэ. «Биллэн туран, доҕордуу дойдулары кытта үлэлэһэр эрэсииммитин уонна бириинсиппитин хат саҥардыахпыт. Этиибитин Владимир Путин өйөөтө. Пуорум бүтээтин, этиибитин өссө чуолкайдаан, ымпыгын-чымпыгын ырытан киллэриэхпит. Технологиялары, дипломнары, сертификаттары хардарыы билинии мэхэньиисимнэрэ толору үлэлииллэрин, баларга сөптөөх сыана быһылларын баҕарабыт. Маннык ТОР-дарга оҥоһуллубут бырайыактары  аҥардас судаарыстыба иһинээҕи сокуоннарга эрэ буолбакка, дойдулар икки ардыларынааҕа сөбүлэһиилэргэ олоҕуралларын туруорсабыт», – диэтэ кини.

«Саха сирэ» хаһыат,

Уһук Илиҥҥи ФУо Полпредствотын пресс-сулууспатын хаартыскалара

+1
0
+1
0
+1
0
+1
0
+1
0
+1
0
+1
0