Бэҕэһээ, “Триумф” спортивнай кииҥҥэ Арассыыйаҕа Экология сылын уонна өрөспүүбүлүкэҕэ Ыччат сылын түмүктэниитин бэлиэтээтилэр. edersaas.ru
Ол курдук, РФ-га кэлэр сыл Доброволец, Саха сиригэр Дьарыктаах буолуу сылларынан биллэриллибиттэрэ. Онон, айылҕа харыстабылын миниистирэ Сахамин Афанасьев сыл бэлиэтин ыччат дьыалаларыгар уонна дьиэ кэргэн бэлиитикэтин миниистиригэр Афанасий Владимировка туттарда.
“Арассыыйаҕа Экология сылын биллэрэн, РФ президенэ ыйаахха илии баттаабытыгар, Саха сирин олохтоохторо үөрэ ылыммыттара. Биһиги төрөөбүт дойдубутун уонна айылҕабытын олус таптыыбыт, ытыктыыбыт. Бу сыл устата өрөспүүбүлүкэбит хас үһүс олохтооҕо экологическай тэрээһиҥҥэ кыттыыны ылла”, — диэн Сахамин Афанасьев бэлиэтээтэ. Кини иһитиннэрбитинэн, экологическай куттала суох буолуу иһин биэс уонтан тахса араас тэрээһин ыытыллыбыт.
Маны таһынан, Ыччат сылын түмүктээн, кэлэр сыл бэлиэтин Ыччат миниистирэ Афанасий Владимиров нэһилиэнньэ дьарыктаах буолуутун кэмитиэтин бэрэссэдээтэлигэр Степан Москвитиҥҥа туттарда.
Үөрүүлээх тэрээһиҥҥэ Ил Дархан Егор Борисов: “Ааһан эрэр сылы Ыччат сылынан биллэрбиппит. Кырдьык, олус элбэх бырайыак олоххо киирэн, тэрээһин бөҕөтө ыытыллан, ыччат сылын этэҥҥэ түмүктээтибит. Аны кэлэр сылы – Доброволец сылын сыалларын-соруктарын ыарырҕаппакка толоруохпут, ситиһиэхпит дии саныыбын. Өрөспүүбүлүкэм ыччатынан киэн туттабын”, — диэн санаатын тиэртэ. edersaas.ru