Олунньу ый ортоттуттан саҕалаан, өрөспүүбүлүкэҕэ коронавируснай инфекциянан ыалдьыы аҕыйаан эрэр. Онон олунньу 19 күнүгэр “Триумф” спортивнай кииҥҥэ арыллыбыт амбулаторнай көмө киинэ сабыллыаҕа диэн доруобуйа харыстабылын министиэристибэтэ иһитиннэрэр.
Бастакы күннэргэ 2,5 тыһыынча киһи кэлэн күҥҥэ көрдөрөр эбит буоллаҕына, билигин 150-170 киһи кэлэр буолбут. Амбулаторнай көмө киинэ тохсунньу 27 күнүгэр арыллан үлэлиэҕиттэн, 16 тыһыынча киһи кэлэн көрдөрүммүт. 18 тыһыынча кэриҥэ ИХА-тест оҥоһуллубут, онтон 34%-гар “квид” баара бигэргэммит. 2 тыһыынчаттан тахса киһиэхэ “больничнай лиис” оҥоһуллубут. Манна араас балыыһалартан кэлэн, 175 миэдик кэлэн үлэлээбит.
Амбулаторнай киин сабыллыбытын кэннэ, ханна көрдөрүөххэ сөбүй?
Олорор сиргинэн сыһыарыллыбыт поликлиникаларга тиийиэххэ наада. “Триумфка” баар амбулаторнай кииҥҥэ бүтэһик күннэргэ көрдөрүммүт дьоҥҥо поликлиника бырааһа аудиоконсультация оҥоруоҕа. “Больничнай лиис” арыллыбыт буоллаҕына, тэйиччиттэн олорон сабыахтара. Пациент үтүөрэ илик буоллаҕына, быраас эбии чинчийиини, эмтэниини аныан сөп. Эбэтэр, бэргээтэҕинэ, 122 биир кэлим нүөмэргэ эрийэн, бырааһы ыҥырыахтаах.
Манна даҕатан эттэххэ, поликлиникаларга көрдөрүнэ кэлбит дьоҥҥо босхо суһал тестэри оҥороллор. «Ковид» баара тута билиннэҕинэ, туспа аанынан киллэрэллэр. Тумуулаабыт дьон атын аанынан бараллар. Холобур, Дьокуускай куорат мэдиссиинэҕэ киинигэр үлэ оннук тэриллибит.
Ангелина Васильева, “Саха сирэ” хаһыат, edersaas.ru