Коронавирус дьаҥа муҥутуур чыпчаалга тиийэн турар, мантан инньэ сыыппара түһэр ини диэн бүк эрэниэххэйиҥ.
Ил Дархан Айсен Николаев инстаграмыгар коронавирус дьаҥа үрдээбитинэн сибээстээн, Саха сирин олохтоохторуттан араас хабааннаах ыйытыылар, көрдөһүүлэр киирэллэр диэн иһитиннэрдэ. Бүгүн Айсен Сергеевич СӨ Бэрэссэдээтэлин солбуйааччы Ольга Балабкинаны уонна СӨ Доруобуйа харыстабылын миниистирэ Лена Афанасьеваны кытта көрсөн, бэҕэһээ уонна бүгүн олохтоохтортон кини аадырыһыгар киирбит коронавирус дьаҥар сыһыаннаах ыйыыталары атах-тэпсэн олорон быһаарыста. Олохтоохтор үксүн колл-киин үлэтинэн, быраастары ыҥырыы уонна анаалыһы хомуйуу боппуруостарыгар сыһыаннаах ыйытыылары биэрэллэр эбит. Холобур, биир ийэ оҕотун температурата үрдээбитин иһин бырааһы ыҥырбыт даҕаны, төрдүс күнүн кэлбэтэх. «Оҕону уонна саастаах дьону кытта маннык сыһыан букатын тахсыа суохтаах, бу боппуруос төрдүттэн быһаарыллыахтаах. Кинилэргэ көмө тута оҥоһуллуохтаах. Онон тустаах киин үлэтин хонтуруоллуохха уонна исписэлиистэри элбэтиэххэ наада», — диэн Айсен Николаев быһаччы сорудахтаата.
Кэпсэтиигэ биир сүрүн боппуруоһунан ПЦР анаалыһын ылыы буолла. «Холобур, дьиэ кэргэҥҥэ оҕо ыалдьыбытыгар, педиатр кэлбит уонна тустаах анаалыһы оҕоттон эрэ ылбыт. Оннук буолуо суохтаах, дьиэ кэргэн бары чилиэннэриттэн анаалыс ылыллыахтаах», — диэн Айсен Сергеевич быһааран биэрбит.
Бу күннэргэ үгүс поликлиникаларга атыыр уочараттар үөскээбиттэрэ мэлдьэх буолбатах, оннооҕор иһирдьэ кыайан киирбэккэ, таһырдьа тураллара кытара таҕыста. «Холобур, больничнай лииһин саптараары кэлбит киһи үс чаас кэриҥэ атын ыарыһахтары кытта туруо суохтаах. Маны эмиэ төрдүттэн быһаарыллыахтаах, тус-туһунан уочараттар баар буолуохтаахтар. Онон успуорт тэрилтэлэригэр амбулаториялар кииннэрин аһыыны толору өйүүбүн. Дьону улахан былаһааккаларга мунньуохха. Анаалыһы ылыыны уонна бырааска көрдөрүүнү тус-туспа тэрийиллиэхтээх. Маны ситиһэргэ СӨ Успуордун министиэристибэтигэр «Триумф” успуорт киинин туһанарга этии киирдэ. Билигин бэлэмнэнии үлэтэ бара турар, сарсыҥҥыттан киин үлэлиэхтээх», — диэн Ил Дархан эппит.
edersaas.ru