Трикиҥҥэ аан дойдуга икки рекорду олохтообут саха ыччатын кытары СӨ Бырабыыталыстыбатыгар көрсүһүү буолла.
Соторутааҕыта Гаврил Данилов бу дьарыктанар көрүҥэр уһулуччу ураты дьикти уонна уустук албаһы (трюгу) оҥорон аан дойдуга иккис рекордун олохтообут. Ону Арассыыйа рекордарын Реестригэр(РРР) регистрациялаабыттар.
Сергей Местников Өрөспүүбүлүкэ салалтатын аатыттан саҥа рекордунан биир дойдулаахпытын эҕэрдэлээтэ уонна спортка, үөрэҕэр, тус олоҕор үрдүк ситиһиилэри баҕарда, рекордун туоһулуур норуоттар икки ардыларынааҕы сэртипикээти туттарда.
«Эн өрөспүүбүлүкэбит уонна Арассыыйа ыччаттарыгар дьоһун, үтүө холобур буоллуҥ. Биһиги оҕолорбут талааннарын, дьоҕурдарын, ситиһиилэрин аан дойдуга көрдөрөллөрүттэн үөрэбит, киэн туттабыт уонна салгыы өйүүргэ бэлэммитин биллэрэбит«, — диэтэ Сергей Местников.
Былырыын Гаврил эмиэ бу курдук стрикиҥҥэ аан дойдуга бастакынан уһулуччу уустук элэмиэни көрдөрбүт.
«Мин трикини аан бастаан «ЗОЖигай» бэстибээлгэ көрбүтүм. Ыччат маннык бырайыактартан көрөн бэйэтигэр саҥа хайысханы булар, профессиональнай таһымҥа тиийэ сайдар. Чөл, чэгиэн олохтоох буоларга уонна успуорка туһуламмыт бырайыактар элбэх буолуохтаахтар«, — диир Гаврил.
Трикинг диэни судургутук быһаардахха, спортивнай хамсаныы-имсэнии, манна бойобуой ускуустуба, гимнастика, капоэйра (Бразилия национальнай бойобуой ускуустубата үҥкүүнү, акробатиканы кытта дьүөрэлэһиитэ), уонна да атын спортивнай хамсаныылар киирэллэр, болҕомтоҕо быраҕыллар араас хабааннаах эргиирдэр (сальто) толоруллаллар. «Трикинг» диэни быһаччы «трюки боевых искусств» диэн быһаарыахха сөп дииллэр).
СӨ Ил Дарханын уонна бырабыыталыстыбатын пресс-сулууспата
Хаартыскаларга Андрей Сорокин түһэриилэрэ(СИА)