Саха АССР 100 сылынан СӨ бырабыыталыстыбата дьонугар-сэргэтигэр дьоһун бэлэҕи оҥордо. Бу күннэргэ Национальнай ойуулуур-дьүһүннүүр мусуойга Москваттан Третьяковскай галерея 50 хартыыналаах быыстапката кэлэн турар.
Бастакы 4 күҥҥэ быыстапканы 1,5 тыһыынча кэриҥэ киһи кэлэн көрдө. Бу мусуой былырыыҥҥы бэс ыйынааҕы көрдөрүүтүттэн икки төгүл элбэх. Маны тэҥэ, мусуойга “Территория. Якутск” бэстибээл чэрчитинэн, Москватааҕы аныгы ускуустуба мусуойун быыстапката эмиэ буола турар. Бу быыстапка интерактивнай, оонньуулаах, онон ордук ыччакка интэриэһинэй буолуохтаах.
«Сокровища Третьяковской галереи» быыстапкаҕа сылдьаары, каассаҕа уочарат үөскээтэ. Ол эрээри, быыстапкаҕа элбэх киһини тэҥинэн киллэрбэттэр. Барыта үс саала баар, уотунан-күөһүнэн киэргэтэн, галерея курдук оҥорбуттар, уопсайынан, Третьяковскай мусуой ис эйгэтигэр маарыннаппыттар.
Манна Репин, Шишкин, Брюллов, Тропинин, Айвазовскай, Кустодиев, Суриков, Саврвсов, Коровин, уо.д.а. курдук нуучча ойуулуур-дьүһүннүүр ускуустубатын үрдүк таһымҥа таһаарбыт биллэр-көстөр худуоһунньуктар чыпчаал айымньылара, 150-200 саастаах хартыыналара кэлэн көрдөрүүгэ тураллар. Бу Арассыыйа култууратын улуу нэһилиэстибэтэ буолар. Сорох аатырбыт хартыыналары Третьяковскай мусуой бастайааннай көрдөрүүгэ турар экспозициятыттан уһулан аҕалбыттар.
Быыстапка от ыйын 17 күнүгэр диэри туруоҕа. Мусуой сайыҥҥы эрэсиимҥэ көстө: өрөбүлэ суох, чэппиэртэн баскыһыанньаҕа диэри – 11 чаастан 7 чааска диэри, сэрэдэҕэ – 12 чаастан киэһэ 8 чааска диэри үлэлиир. Онон үлэ кэнниттэн да кэлэн, көрүөххэ сөп.
Билиэт сыаната – 600 солкуобай, чэпчэтиинэн туһанар дьоҥҥо – 300 солкуобай, 7-гэр диэри саастаах оҕолорго, I, II группалаах инбэлииттэргэ, сэрии бэтэрээннэригэр, тулаайах, инбэлиит оҕолорго — киирии босхо.
Билсэр төлөпүөн: 8 (4112) 33-52-79, 8 (4112) 33-52-80 (каасса).
Ангелина Васильева, “Саха сирэ” хаһыат, edersaas.ru
Хаартыска: exo.ykt.ru