Саҥа дьыл бастакы күннэригэр Өрөспүүбүлүкэтээҕи 2 №-дээх балыыһа—Суһал медицинскэй көмө киинин травматологияҕа пууна өрөмүөннэннэ уонна саҥа ангиографическай кэбиниэт аһылынна.
edersaas.ru
Саха Өрөспүүбүлүкэтин Ил Дархана Айсен Николаев былырыын Дьокуускай куорат травмотологияҕа пуунун саҥардыы боппуруостарынан дьарыктанарга сорудах биэрбитэ. Биллэрин курдук, 300 кв. миэтэрэттэн эрэ тахса иэннээх кыра дьиэҕэ эмтэнээччилэр күннэрин барыыллара, үҥсүү суругун ахсаана элбии турара.
“Травматология пуунугар биир сыл иһигэр улахан саҥардыы үлэтэ ыытылынна. Тэрилтэ үлэлиир сирэ икки төгүл улаатан, 800 кв. миэтэрэ кэриҥэ буолла. Аан бастаан уонна иккистээн-үһүстээн кэлэр эмтэнээччилэри туспа кэбиниэттэргэ көрөр буоллулар. Ону сэргэ, пуун дьиэтин эмтиир тэриллэринэн сэбилээһиҥҥэ дьоһуннаах үлэ барда”, — диэн Ил Дархан Айсен Николаев травматология пуунун аһыллыытыгар сылдьан эҕэрдэтин тириэртэ.
Ол курдук, травматология пууна икки лииптээх буолла. Лииптэр ситэри оҥоһулуннахтарына, пуун кулун тутар 1 күнүттэн толору үлэлиэҕэ. Бу эчэйбит, оһолломмут дьон тута хаачыстыбалаах медицинскэй көмөнү ылалларыгар көмөлөһүөҕэ. Ил Дархан сорудаҕынан, электроннай уочарат уонна маршрутизатор баар буолуоҕа.
Надежда ЕГОРОВА, “Саха сирэ”, edersaas.ru
Доруобуйа харыстабылын министиэристибэтин пресс-сулууспатын хаартыската