Трансплантационнай-успуорт оонньууларыттан кыайыы көтөллөөх кэллилэр
От ыйын 29-31 күннэригэр Москваҕа трансплантационнай-успуорт бастакы оонньуулара буолан аастылар.
edersaas.ru
Саха сириттэн манна тиийэн кытта сылдьалларын уонна хайыы үйэ элбэх ситиһиилэммиттэрин истэн үөрбүппүт. Онон, Саха сириттэн кыттыбыт хамаанда аатыттан биһиэхэ Мариянна Константинова маннык кэпсээтэ:
— Трансплантационнай-успуорт Арассыыйатааҕы бастакы оонньууларын хас да тэрилтэ: Арассыыйа Доруобуйа харыстабылыгар министиэристибэтин “В.И.Шумаков аатынан трансплантологияҕа уонна ускуустубаннай уорганнарга НМИЦ” трансплантология салаатыгар сүрүн тэрилтэтэ, “НЕФРО-ЛИГА” нефрология ыарыһахтарын бөдөҥ тэрилтэтэ, “Своя атмосфера” аһымал тэрилтэ, доруобуйа харыстабылын сайыннарыы национальнай тэрилтэтэ кыттыһан тэрийдилэр.
Күрэхтэһии барыта Н.И.Пирогов аатынан РНИМУ успуорт комплексыгар буолла. Манна даҕатан эттэххэ, маннык оонньуулар Европаҕа ыытыллыбыттара ыраатта (Казахстаҥҥа быйыл 10-с сылын тэриллэр, сахалар 2019 с. кыттан турардаахпыт). Онтон Арассыыйаҕа дьэ, саҥардыы тэрилиннэ. Күрэхтэһии сыалынан-соругунан бүөр, быар, сүрэх эбэтэр тыынар уорганнарыгар трансплантация (көһөрүү) оҥорторбут дьон физкультуранан уонна успуордунан дьарыктанан эттэрин-ханнарын сайыннаралларын көҕүлээһин, чөл олоҕу тутуһуу, кинилэр ыарахан ыарыыттан быыһаналларын ситиһии уонна донорствоны өйөөһүн буолар.
Күрэхтэһиигэ дартс, саахымат, боулинг, остуол тиэнниһэ, бадминтон, 100 уонна 1000 м. сүүрүү, хаалыктаах хаамыы, харбааһын, волейбол, футбол, баскетбол курдук көрүҥнэргэ Арассыыйа 18 субъегыттан (Волгоград, Екатеринбург, Ижевск, Йошкар-Ола, Казань, Калининград, Санкт-Петербург, Омск, Петрозаводск, Рязань, Саха сирэ, Бурятия, Чувашия өрөспүүбүлүкэлэрэ, Башкортостан, Челябинскай, Тульскай, Москва уобаластара, Москва) 74 спортсмен мустан күөн көрүстэ.
Саха сириттэн биһиги 5 буолан тиийэн, бары ситиһиилээхтик кыттан үөрэн-көтөн кэллибит. Охлопкова Маргарита дартска – 2-с, Константинова Марианна остуол тиэнниһигэр — 1, хаалыктаах хаамыыга -2, Иванова Туйаара-Умсулҕана остуол тиэнниһигэр – 1, Иванова Наталья хаалыктаах хаамыыга 2 миэстэлэргэ таҕыстыбыт. Находкин Эдуард сүүмэрдэммит хамаандаларга киирэн футболга — 1, волейболга, баскетболга — 2 буолла уонна остуол тиэнниһигэр — 3, 100 м. сүүрүүгэ 1 миэстэлэри ылла. Өссө күрэх быыһыгар Охлопкова Маргарита өбүгэ төрүт оонньууларыттан хаамысканы уонна хабылыгы көрдөрөн уонна кэпсээн, кыра күрэх ыытан дьон сэнээриитин ылла. Икки кыайыылаах сахалыы бэлэххэ тиксэн, үөрүүлэрэ муҥура суох этэ.
Ити курдук, атын сиртэн кэлбит дьону-сэргэни кытары билсэн-көрсөн, сэһэргэһэн 3 күммүт биллибэккэ ааста. Тэрийээччилэр аны маннык оонньуулар инникитин да ыытылла туруохтара диэн бигэтик эрэннэрдилэр. Онон мантан антах кыттааччы өссө элбиирэ күүтүллэр. Кыйан баарбакка хаалбыт дьон ымсыыран дьэ, дьарыктаныах буола сылдьаллар.
Бэйэбит өрөспүүбүлүкэбитигэр иккитэ спартакиада ыытыллан, сэргэхсийии тахсыбыта. Кэлин, хомойуох иһин, пандемиянан сибээстээн тохтообута. Сөргүтүллэрэ буоллар диэн баҕа санаалаахпыт, — диэн Марианна Степановна Константинова маннык оонньууларга кыттар кыах биэрбиттэригэр донордарыгар, эмчиттэригэр, чугас дьонноругар махталын биллэрдэ.
Надежда ЕГОРОВА, «Саха сирэ», edersaas.ru