Статистика сыыппараларын сыымайдаан көрдөххө, саамай улахан хамнаһы бырамыысыланнас салаатыгар үлэлии сылдьар дьон аахсар. Холобур, алмааһы хостооччулар орто хамнастара 131505,8 солкуобайга тэҥнэһэр.
Баһырхай хамнаһынан хааччыйар бырамыысыланнай хампаанньаларга үгүс өттүгэр кэлии эрэ дьон үлэлиир. Ил Түмэҥҥэ ыытыллыбыт Парламентскай истиилэргэ СӨ бырамыысыланнаһын уонна геологиятын миниистирэ Андрей Панов иһитиннэрбитинэн, «Якутуголь» хампаанньаҕа үлэлии сылдьар дьон 99%-нын, «Алданзолото» АУо-ҕа – 93%-нын, ЯТЭК-ка – 95%, «Газпром Трансгаз Томск» хампаанньаҕа – 90%, «Селигдарга» – 80%, «Колмарга»– 68%-, «Транснефть-Восток» – 54%, «ЭльгаУголь» – 56%, «Газпром добыча Ноябрьск» – 49%-нын олохтоохтор ылаллар эбит. Саба быраҕан көрдөххө, барытыгар олохтоохтор үлэлииллэр. Онтон «Сургутнефтегаз» ААУо-ны ылан көрүөҕүҥ. Манна хартыына олох атын. Арассыыйа биир бөдөҥ хампаанньата биһиги өрөспүүбүлүкэбитигэр 8 тыһыынча кэриҥэ киһини үлэлэтэр. Мантан биир эрэ тыһыынчата олохтоохтор. Ону даҕаны быстах үлэлэргэ сылдьар буолуохтаахтар.
Хамнас туһунан эттэххэ, таас чоҕу хостуур предприятиеларга орто хамнас 70246,8 солк., ньиэби хостооһуҥҥа – 93962,9 солк., атын туһалаах баайы хостуур салааларга – 131049,5 солк. быһыллыбыт. Бу атырдьах ыйдааҕы Госкомстат чахчыларынан. Билигин даҕаны мантан уларыйа илик буолуохтаах.