“Траектория карьеры” дьаарбаҥкаҕа 4 тыһыынчаттан тахса үлэ миэстэтин билиһиннэрдилэр
Өрөспүүбүлүкэҕэ балаҕан ыйын 15 күнүгэр эдэрдэргэ “Траектория карьеры” үлэ миэстэтин IV дьаарбаҥката тэрилиннэ. Бу тэрээһин Саха сиринээҕи Нэһилиэнньэ дьарыктаах буолуутун киинин бары филиалларыгар уонна бэрэстэбиитэлистибэлэригэр ыытыллар. Үлэлиэн баҕалаахтар тута сэһэргэһиини ааһаллар.
Дьокуускай куоракка дьаарбаҥканы “Куруһаалаҕа” үөрүүлээхтик арыйыыга СӨ Ил Дарханын уонна СӨ Бырабыыталыстыбатын Дьаһалтатын салайааччыта Георгий Михайлов эҕэрдэлээтэ.
АГИП салайааччыта бэлиэтииринэн, аныгы кэм аныгы усулуобуйалары ирдиир, балар олохпут-дьаһахпыт бары эйгэтигэр биллэр уларыйыылары киллэрэллэр. Бүгүн саҥа оҥорон таһаарыылары уонна өҥөлөрү сайыннарыыга сөптөөх усулуобуйалар үөскээтилэр, онон саҥа үлэ миэстэлэрэ тэриллэллэр.
“Саха сирэ эдэр дьоҥҥо тирэнэр – кинилэр өрөспүүбүлүкэ үлэлиир кыахтаах дьонун 35 бырыһыанын ылаллар. Ол иһин эдэрдэри үлэҕэ ылыы дьоһун соруктартан биирдэстэринэн буолар уонна мантан экэниэмикэбит туруктаах сайдыыта тутулуктаах”, — диэн бэлиэтээтэ кини.
Георгий Михайлов үлэлиэн баҕалаах эдэр дьоҥҥо бэйэлэрин кыахтарын толору арыйан, өрөспүүбүлүкэлэрин уонна дойдуларын сайдыыларын туһугар дьоһун кылааттарын киллэрэллэригэр ыҥырда.
Саха сирин Нэһилиэнньэ дьарыктаах буолуутун судаарыстыбаннай кэмитиэтин бэрэссэдээтэлин солбуйааччы Савва Михайлов этэринэн, бүгүн үлэ ырыынагар балаһыанньа туруктаах. Тустаах кэмитиэт 14 тыһыынчаттан тахса аһаҕас үлэ миэстэтэ баарын уонна бу үлэтэ суох ахсаанынааҕар икки төгүл элбэҕин бэлиэтиир. Дьаарбаҥкаҕа 15 салаанан 4 тыһыынчаттан тахса үлэ миэстэтин билиһиннэриэхтэрэ.
Сыл аайы ыытыллар дьаарбаҥка чэрчитинэн 2022 сылга нэһилиэнньэни үлэнэн хааччыйыыга бастыҥ үлэ биэрээччилэр Махтал суругу туттулар: Дьокуускайдааҕы килиэп кэмбинээтэ” АУо, “Сахатранснефтегаз” АУо, “Медлайн” ХЭТ, “Долун” ХЭТ, “Жатай” куораттааҕы Биир кэлим сакаасчыт сулууспата МУП, “Банкетпроф” ХЭТ, урбаанньыттар Андрей Селихов, Любовь Макарова.
Дьаарбаҥка кыттыылаахтара министиэристибэлэр уонна биэдэмистибэлэр үлэһиттэрин кытта кэпсэттилэр. Тэрилтэлэр салайааччылара баар миэстэлэр, үлэ усулуобуйатын, идэҕэ үөрэтии тустарынан кэпсээтилэр. Маны сэргэ маастар-кылаастар, трениннэр уонна сэминээрдэр буоллулар.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Хаартыска: СИА
Бэлэмнээтэ Женни Стрюкова.