Сунтаар улууһун Тойбохой нэһилиэгэр өрөспүүбүлүкэтээҕи кыраайы үөрэтэр мусуой баар. Мусуойтан чугас ботаническай саадтаах.
Социальнай ситимҥэ Тойбохойго талахтан сэлии оҥорбуттар диэн сурах кэллэ. Тута Тойбохой мусуойугар сибээскэ таҕыстыбыт.
Мусуой дириэктэрин солбуйааччы Марта Васильевалыын кэпсэттибит:
— Биһиги нэһилиэкпитигэр Бэрэ уонна Эбэ диэн күөллэрдээхпит. Балар икки ардыларыгар харыйа, тиит мас арааһа үүнэр сирдээхпит. Олус элбэх ыарҕа талах хатар. Олору биһиги быраҕан кэбиспэккэ, туһаҕа таһаарарга санаммыппыт.
Мусуойбутугар палеонтологическэй саалалаахпыт. Онно сэлии уҥуохтара бааллар. Оҕолорго кыылы бэйэтин көрдөрөр туһуттан, былырыын ыарҕа талахтары таҥан, 5 миэтирэ үрдүктээх сэлии оҥорбуппут. Маны барытын мусуой кэллэктиибэ бэйэтэ оҥордо.
Күһүн аайы мусуойбутугар мас олордобут, тугу эрэ саҥардабыт. Онон нэһилиэкпитигэр билигин ботаническай саадка куобахтары, туртастары таһынан, аны сэлии кыстыаҕа.
Ульяна Захарова, «Саха сирэ» хаһыат, edersaas.ru
Хаартыска — батсааптан.