Көрөөччү “Саха” НКИХ “Күн дэлэйэ” биэриитин хайа күн тахсыаҕыттан сөбүлээтэ.
Саха маанылаах аһын көрдөрөр, кэпсиир биэрии ас астыырга олус көмөлөөҕүн таһынан, билиини хаҥатар буолан, үгүс киһи сэргээн көрөр.
Биэрии ааптара уонна ыытааччыта суруналыыс Екатерина Эверстова сарсын, өрөбүлгэ, көстөөрү турар биэрии туһунан бу курдук билиһиннэрдэ:
— Аҕа дойдуну көмүскээччилэр бырааһынньыктарын көрсө олунньу 20 күнүгэр 12 ч. 45 мүнүүтэҕэ “Күн дэлэйэ” биэриигэ эр дьон сөбүлээн аһыыр булт аһылыгын иҥэмтэтин, доруобуйаҕа туһатын туһунан кэпсиэхпит. Эр дьон тугу аһаатахтарына доруобай, күүстээх, сэниэлээх буолуохтарай? Кус, таба этэ, силииэт миинэ мүһэ эр киһиэхэ күүс биэрэр астар.
Биллэн турар, эт миинэ, балык, кус, таба этэ күннээҕи аһылыкка баар буоллаҕына, эрчим, кыах баар буолуоҕа.
Маны таһынан, сыаттан уонна хаһаттан хайдах сонун астары астыахха сөбүн билиэххит. Холобура, тотоойу хаһалаах лэппиэскини биирдэ эмэ амсайбыккыт дуо? Онон бу лэппиэски үгүс көрөөччүнү интэриэһиргэтиэҕэ.
Дурда-хахха,эркин буолар эр дьоммут сөптөөх аһылыктарын туһунан биэрии ютубка эмиэ баар буолуоҕа. Көрөөччүлэрбит баҕа санааларын,этиилэрин инстаграмҥа @кyn_deleye_nvk сирэйгэ күүтэбит!
“Ас баар – кыах баар!” — өрөбүллээҕи биэриини хайаан да көрөргүтүгэр ыҥырабыт!
Елена ПОТОЦКАЯ, “Саха сирэ” хаһыат, edersaas.ru