“Тотальнай дьыктаан” Арассыыйаҕа 2004 сылтан сөпкө суруйууну киэҥник тарҕатар сыаллаах ыытыллар. 2000-с сыллар саҕаланыыларыгар Новосибирскайдааҕы судаарыстыбаннай университет гуманитарнай факультетын “Глум-клуб” устудьуоннар кулууптара маассабай дьыктааны суруйар идиэйэни олоххо киллэрбиттэрэ.
Ким баҕарар билиитин тургутан көрөн, суруйуон сөп. Араас эрэгийиэннэргэ, дойдуларга биир кэмҥэ ыытыллар. Дьыктаан тиэкиһэ классик да, аныгы да суруйааччылар айымньылара буолар.
Быйыл Дьокуускайы “Тотальнай дьыктаан-2021” киининэн оҥорорго этии киирбитэ. Онон биэс куорат түмүктүүр куоластааһыҥҥа киирэн, сэтинньи 24 күнүгэр диэри “Тотальнай дьыктаан” саайтыгар ыытылла турар.
Билиҥҥи туругунан, Дьокуускай куорат 8 тыһыынчаттан тахса куоластаах кыайан иһэр. Ол кэнниттэн Рязань 5763 куоластаах, Ярославль 1930 куоластаах иһэллэр.
Ил Дархан Айсен Николаев “Инстаграмҥа” сирэйигэр куоластааһыны өйүүргэ ыҥырбыта. “Дьокуускай аан дойдутааҕы аахсыйа киинэ буолара бэйэбититтэн тутулуктаах”, — диэн эппитэ.
Күрэс түмүгэр 2021 сыл олунньу 6 күнүгэр биллиэҕэ. Маассабай дьыктааны муус устар 21 күнүгэр аан дойду үрдүнэн суруйуохтара. Дьыктаан тиэкиһин суруйааччы Дмитрий Глуховскай аан дойдутааҕы аахсыйа киинигэр көтөн кэлэн, ааҕыаҕа.
Бу сигэнэн киирэн, http://totaldict.ru/voting_capital ким баҕарар Дьокуускай туһугар күҥҥэ биирдэ куоластыан сөп. Саайтка киирэн куоластыыргар регистрацияны ааһаҕын, эбэтэр социальнай ситим учуотунан киириэххэ сөп. «Куоластыахха» диэн кунуопканы баттаан баран, каартаҕа Дьокуускай төгүрүгүн баттыыгын. Онон кытаатыҥ, хас күн аайы куоластыахха сөп эбит! Өссө биирдэ түмсүүлээхпитин көрдөрөн, кыайыыга дьулуһуоҕуҥ!
Ангелина Васильева, “Саха сирэ” хаһыат, edersaas.ru