«Тотальнай дьыктаан» бу субуотаҕа ыытыллыа

Бөлөххө киир:

“Тотальнай дьыктаан” муус устар 9 күнүгэр Дьокуускайга түөрт сиринэн буолуоҕа. Ол туһунан эрэгийиэннээҕи сүрүннээччи Ирина Жигадло  кэпсээтэ.

Дьокуускай куорат олохтоохторо Национальнай бибилэтиэкэ историческай саалатыгар, “Сэргэлээх уоттара” култуура киинигэр кэлэн суруйуохтарын сөп. Өссө икки былаһаакка сабыылаах: бииригэр омук устудьуоннара, иккиһигэр “Точка кипения” кииҥҥэ оскуола үөрэнээччилэрэ суруйуохтара.

Миэстэ ахсаана хааччахтаах, онон кэлэн суруйар буоллахха, эрдэттэн сайаапка биэриэххэ наада. Холобур, Национальнай бибилэтиэкэҕэ 45 эрэ миэстэ баар. Тиэкиһи Арассыыйа артыыската Анна Слю ааҕыаҕа. “Сэргэлээх уоттара” кииҥҥэ 200 миэстэ баар. Дьыктааны прозаик, суруналыыс Василий Авченко ааҕыаҕа, кини Владивостоктан кэлиэхтээх. Бүгүҥҥүттэн регистрация саҕаланна, дьон номнуо сурутан эрэллэр, — диэн кини эттэ.

Бу былаһааккаларга кыайан кэлэр кыаҕа суох дьоҥҥо дьыктаан онлайн көрүҥүнэн ыытыллар. Ол туһугар totaldict.ru саайтка киирэн, регистрацияланыахха наада. Муус устар 9 күнүгэр Дьокуускай бириэмэтинэн күнүс биир чааска бу саайтка киирэн, ааҕалларын истэн олорон, суруйуохха сөп. Суруллубут тиэкис бэрэбиэркэҕэ ыытыллар. Аҕыйах хонон баран, бу саайт Тус кэбиниэтигэр дьыктаан түмүгүн уонна сэртипикээти ыыталлар.

Ону тэҥэ, #пишемдома  уонна  #проверяемдома көрүҥүнэн суруйбут дьон үлэлэрин бэрэбиэркэҕэ ыыппаттар. Дьыктаан түмүгүн саайтка көрөн, бэйэлэрэ бэрэбиэркэлэнэллэр. Онон сэртипикээти ылбаттар.

Дьыктаан араас көрүҥнэригэр атын-атын тиэкистэр ааҕыллыахтара. Быйылгы дьыктаан ааптара – суруйааччы Марина Степнова. Кини «Женщины Лазаря», «Сад», «Хирург», о.д.а. арамааннары суруйбута. Быйылгы «Тотальнай дьыктаан» киинэ — Ярославль куорат.

Санатар буоллахха, былырыын «Тотальнай дьыктаан» киининэн Дьокуускай буолбута. Тиэкиһи ааптар, суруйааччы Дмитрий Глуховскай кэлэн аахпыта.

Ангелина Васильева, “Саха сирэ” хаһыат, edersaas.ru

Хаартыска: goldenmost.ru

+1
0
+1
0
+1
0
+1
0
+1
0
+1
0
+1
0