Бүгүн 2021 сылга «Тотальнай дьыктаан» киинэ буолар иһин онлайн-куоластааһын бүтэһик күнэ.
edersaas.ru
Сэтинньи 24 күнүнээҕи туругунан, куоластааһыҥҥа Дьокуускай куорат инники күөҥҥэ иһэрэ — куораты 11 тыһыынчаттан тахса киһи өйөөбүт. Дьокуускай кэнниттэн Рязань — 8 тыһыынчаттан тахса куоластаах. 20:00 чааска түмүктүүр түһүмэххэ киирбит биэс буолбакка, алта куорат аата билиннэ: Дьокуускай (11411 куолас), Рязань (8998 куолас), Ярославль (2905 куолас), Салехард (2453 куолас), Саранскай (2220 куолас), Томскай (2216 куолас). Икки кэлиҥҥи куорат биэтэккэ араа-бараа кэлэн, дьүүллүүр сүбэ биэс куораты буолбакка, алта куораты кыайыылаах ахсааныгар киллэрдэ. Маны таһынан, куоластааһыҥҥа Волгоград, Ижевскай, Калининград, Майкоп, Берлин (Германия), Нур-Султан (Казахстан) уонна Стамбул (Турция) кыттыыны ыллылар. Кыайыылаахтар ахсааннарыгар киирбит алта куорат хамаандата үһүс түһүмэххэ киирэр. Онтон салгыы куораты билиһиннэрэр уонна бырайыак көмүскүүр.
Тотальнай дьыктааны ыытар куораты талар дьүүллүүр сүбэҕэ мусукаан Диана Арбенина, суруйааччы, Тотальнай дьыктааны ааҕааччы Дмитрий Глуховскай, «Грамота.ру» портал кылаабынай эрэдээктэрэ Владимир Пахомов, ТАСС пресс-киинин салайар Николай Яковлев уо.д. а. бааллар.
Тотальнай дьыктааны ыытар кыайыылаах куорат 2021 сыл олунньу 6 күнүгэр биллиэҕэ. Тиэкис ааптара, суруйааччы Дмитрий Глуховскай дьыктааны аан дойдутааҕы аахсыйа сүрүн былаһааккатыгар муус устар 10 күнүгэр ааҕыаҕа.
Елена ПОТОЦКАЯ, «Саха сирэ» хаһыат, edersaas.ru