«Тотальнай дьыктаан-2021»: куоластааһыҥҥа Дьокуускай инники күөҥҥэ таҕыста

Дьокуускай «Тотальнай дьыктаан-2021» киининэн буолар иһин куоластааһыҥҥа, сэтинньи 15 күнүнээҕи туругунан, инники күөҥҥэ таҕыста.

Билиҥҥи туругунан, Дьокуускай 1670 тахса куоластаах. Рязань — 1560, Ярославль — 950, Саранскай — 840, Томскай — 820 куоластаахтар диэн СИА иһитиннэрэр.

Дьокуускай иһин куоластааччылар тотальнай дьыктаан сайтыгар киирэҕит. Куоластааһын сэтинньи 24 күнүгэр күнүс 12 чааска диэри  (Москва бириэмэтинэн) ыытыллар. Ким баҕалаах  totaldict.ru саайтка киирэн регистрацияланар уонна сууккаҕа биирдэ куоластыыр.

Кыайыылаах 2021 сыл олунньу 6 күнүгэр Тотальнай дьыктаан үгэс буолбут кэмпириэнсийэтигэр биллэр. Оттон аахсыйа 2021 сыл муус устар 10 күнүгэр диэри аан дойду үрдүнэн ыытыллар. Тотальнай дьыктааҥҥа Дмитрий Глуховскай айымньыта ааҕыллар.

Санатан эттэххэ, кэнники сэттэ сылга Саха сиригэр аҕыс тыһыынча кэриҥэ киһи дьыктааҥҥа кыттыбыта.

Дьокуускай куоластааһыҥҥа, билиҥҥитэ, инники күөҥҥэ түстэ. Кытаатыҥ, кыттыһыҥ, куоластааҥ! Түмсүүлээхпитин көрдөрүөҕүҥ!