«Тотальнай дьыктаан-2021»: Дьокуускай инники күөҥҥэ сылдьар
16.11.2020
«Тотальнай дьыктаан-2021» киининэн буолар иһин куоластааһыҥҥа Дьокуускай хаһыс да күнүн инники күөҥҥэ иһэр.
Сэтинньи 10 күнүгэр Москва бириэмэтинэн 12 чаастан «Тотальнай дьыктаан-2021» киининэн буолар иһин куоластааһын саҕаламмыта. Түмүккэ саамай элбэх куолаһы хомуйбут биэс куорат киллэриллиэхтээх.
Билиҥҥи туругунан Дьокуускай 4257 куоластаах. Ааспыт күҥҥэ инники кэккэҕэ киирбит куораттар бэйэлэрин позицияларын эмиэ туталлар. Дьокуускайы кытары топ-5 иһигэр киирэллэр: Рязань (2473 куоластаах), Ярославль (1117), Томскай (968), Саранскай (924).
Дьокуускай «Тотальнай дьыктаан-2021» киининэн буолара биһиги бары куоластааһыммытыттан тутулуктаах. Ким баҕарар totaldict.ru саайтка киирэн сурутан баран куоластыан сөп. Куоластааһын сэтинньи 24 күнүгэр Москва бириэмэтинэн күнүс 12 чааска диэри ыытыллар.
Кыайыылааҕы үгэс буолбут кэмпириэнсийэҕэ, 2021 сыл олунньу 6 күнүгэр биллэриэхтэрэ. Аахсыйа 2021 сыл муус устар 10 күнүгэр аан дойду үрдүнэн ыытыллыа. Быйылгы «Тотальнай дьыктаан -2021» тиэкиһин ааптара Дмитрий Глуховскай.
Санатан эттэххэ, биллиилээх суруйааччы, «Национальнай бестселлер» литературнай биримэмийэ лауреата, «Тотальнай дьыктаан-2020» тиэкиһин ааптара Андрей Геласимов Дьокуускай куораты бу далааһыннаах тэрээһин киининэн оҥорор туһунан этии киллэрбитэ.
Дьокуускай дьыктааны суруйуу аахсыйатыгар бастаан 2013 сыллаахха кыттыбыта. Онтон ыла улуустар олохтоохторо, өрөспүүбүлүкэ ыалдьыттара, ол иһигэр тас дойдуттан кэлбит ыалдьыттар дьыктааны суруйаллар. Ааспыт сэттэ сылга дьыктааны суруйууга аҕыс тыһыынчаттан тахса киһи кыттыбыта бэлиэтэнэр.
СӨ Ил Дархан уонна Бырабыыталыстыба пресс-сулууспата
+1
+1
+1
+1
+1
+1
+1