Муус устар 22 күнүгэр Саха Өрөспүүбүлүкэтигэр ыытыллыбыт «Тотальнай дьыктаан-2021» аахсыйа кыттыылаахтарын наҕараадалаатылар.
Үөрүүлээх быһыыга-майгыга СӨ Бырабыыталыстыбатын Бэрэссэдээтэлин солбуйааччы Сергей Местников Ил Дархан уонна бырабыыталыстыба аатыттан тэрийээччилэри уонна аахсыйа кыттыылаахтарын дьыктаан ситиһиилээхтик ааспытынан эҕэрдэлээтэ. Ааспыт сылга ыытыллыбыт дьыктаан кэнниттэн Ил Дархан Айсен Сергеевич Николаев бүтүн аан дойдуга ыытыллар «Тотальнай дьыктаан-2021» Дьокуускайга ыытылларын ситиһэр туһунан этии киллэрбитэ. Саха сирин олохтоохторо бу этиини истэн эрэ кэбиспэккэ өйөөбүттэрэ, күрэхтэһиигэ кыайыынан бигэргэннэ.
Дьокуускайга ыытыллыбыт «Тотальнай дьыктаан-2021″ үрдүк таһымнаахтык тэрилиннэ. Аан дойду үрдүнэн 675 тыһ. кэриҥэ киһи кыттыһан саҥа рекорд олохтонно. Саха сиригэр тотальнай дьыктааны 300-тэн тахса сиргэ 8000 тахса киһи кытынна», — диэн Сергей Васильевич бэлиэтээтэ. Ону сэргэ Ил Дархан сорудаҕынан «Тотальнай дьыктаан-2021» тэрээһинигэр эрэгийиэн министиэристибэлэрэ уонна М.К.Аммосов аатынан Хотугулуу-Илиҥҥи федеральнай университет кыттыылаах улахан хамаанда тэриллэн үтүө суобастаахтык үлэлээбиттэрин бэлиэтээтэ. Бука бары тэрийсибит дьоҥҥо барыларыгар ис сүрэҕиттэн махтанарын туһунан эттэ. «Тотальнай дьыктаан-2021» аахсыйа иһинэн алҕаһа суох суруйуу бэстибээлэ ыытыллан, нуучча тылын таптыыр дьону-сэргэни, тыл үөрэхтээхтэрин, учууталлары, литератордары түмүстүлэр диэтэ.
Үрдүк таһымнаах, үтүө суобастаах үлэтин уонна «Тотальнай дьыктаан-2021» үөрэх аахсыйатыгар кылаатын иһин СӨ Бырабыыталыстыбатын Бэрэссэдээтэлэ Адрей Тарасенко Махтал суругунан СӨ Киин бибилэтиэкэтин эрэгийиэннээҕи култуурнай үөрэтэр киинин сэбиэдиссэйэ Галина Кутугутова, СӨ Киин бибилэтиэкэтин холбоһуктаах үлэтин сэбиэдиссэйэ Светлана Попова, «Ростелеком» филиала «Сахателеком» куораттааҕы техническэй киинин салайааччыта Тимофей Аргунов наҕараадаланнылар.
«Тотальнай дьыктаан-2021» түмүгүнэн дьыктааны өрөспүүбүлүкэ үрдүнэн 152 киһи «туйгун» сыанаҕа суруйда, ол иһигэр Дьокуускайга — 40, улуустарга — 112 киһи. Аахсыйа туйгуннарын сэртипикээттэрин «Тотальнай дьыктаан-2021» координатора Ирина Жигадло үөрүүлээх быһыыга-майгыга туттарда.
Тэрээһиҥҥэ М.К.Аммосов аатынан ХИФУ проректорын үөрэх таһынааҕы үлэҕэ уонна ыччат политикатыгар солбуйааччы Саргылана Нестерова эҕэрдэ тылын эттэ уонна туйгуннарга тотальнай дьыктаан ыстаабын аатыттан Махтал суруктары туттарда.
Аахсыйа тэриллэн ыытылларыгар өрөспүүбүлүкэ үрдүнэн барыта 300 былаһааккаҕа 300-тэн тахса волонтер үлэлээтэ. Кинилэр сыыһата суох суруйуу бэстибээлигэр кыттан экспертэргэ уонна дьыктааны ааҕааччыларга көмө буоллулар. Волонтердар бука бары нуучча тылын таптыыр оскуола үөрэнээччилэрэ, устудьуоннар, бэйэлэрин баҕа өттүлэринэн кэлэн көмөлөстүлэр. Кинилэр ааттарыттан ХИФУ Филологическэй факультетын устудьуона Михаил Донской тыл эттэ.
Тэрээһин түмүгэр Хотугулуу Илиҥҥи федеральнай университет, СӨ үөрэҕириитин уонна наукатын министиэристибэтэ уонна СӨ култуураҕа уонна духуобунай сайдыыга министиэристибэтэ сылын ахсын Сыыһата суох суруйуу бэстибээлин ыытар туһунан сөбүлэҥ түһэристилэр.
Надежда Ильина, edersaas.ru
Андрей Сорокин хаартыскаҕа түһэриилэрэ