Ил Дархан Айсен Николаев өрөспүүбүлүкэбит киин куоратын, Дьокуускайы, «Тотальнай дьыктаан-2021» киининэн буоларыгар өйүүргэ ыҥырда.
Бу туһунан кини Инстаграмҥа (Instagram) бэйэтин страницатыгар суруйда.
«Тотальнай дьыктаан сүрүн былаһааккатынан, өрөспүүбүлүкэбит киин куората,Дьокуускай, буолуон сөп. Дьыктааны суруйуу 2021 сылга ыытыллар. Калининград уонна Берлин, Томскай уонна Стамбул, Ярославль уонна Рязань, онтон да атын кэрэ, олус үчүгэй куораттар «Тотальнай дьыктаан-2021» киининэн буолар иһин куоластааһыҥҥа кытталлар. Ол иһигэр, биһиги Дьокуускайбыт! Биһиги ааҕары олус таптыыр уонна суруксут куораппыт ханнык баҕарар интэриэһинэй, сэргэх, ураты бырайыак киининэн буоларга сөптөөх«, — диэн суруйар Айсен Николаев.
Ил Дархан Дьокуускай «Тотальнай дьыктаан-2021» киининэн буолара биһигиттэн, бука барыбытыттан тутулуктаах диэн бэлиэтиир.
Куонкурус түмүгэ 2021 сыл олунньу 6 күнүгэр биллэр. Тотальнай дьыктааны 2021 сыл муус устар 10 күнүгэр аан дойду үрдүнэн суруйаллар. 2021 сыллаах дьыктааҥҥа Дмитрий Глуховскай айымньыта ааҕыллар. Муус устар 10 күнүгэр, аан дойду үрдүнэн ыытыллар аахсыйа былаһааккатынан буолбут куоракка, дьыктааны тиэкис ааптара ааҕыахтаах.
Тотальнай дьыктаан-2021 киининэн буолар иһин ким баҕарар http://totaldict.ru/voting_capital ссылканан киирэн, сууккаҕа биирдэ куоластыан сөп. Куоластааһын 2020 сыл сэтинньи 24 күнүгэр Москва бириэмэтинэн 12 чааска диэри ыытыллар.
СӨ Ил Дархан уонна Бырабыыталыстыба пресс-сулууспата
+1
+1
+1
+1
+1
+1
+1