Саха сирин баһылыга Айсен Николаев муус устар 13 күнүгэр “Хаҥалас” ТОСЭР резиденнэрин тутуллуохтаах уонна хайыы үйэ тутулла турар инженернэй инфраструктуратын уонна эбийиэктэрин көрдө.
Ил Дархан бастаан Жатайдааҕы судоверфэ тутуллуохтаах былаһааккатыгар сырытта. БуАрассыыйаҕа биир аныгы судоверфэ тутулуннаҕына, өрөспүүбүлүкэҕэ сылга өрүс 10 суудунатын тутар уонна иккиттэн итэҕэһэ суох салгыы устара көҥүллэммэт суудунаны харайар кыахтаныахтара. “Жатайдааҕы үрдүк технологиялаах судоверфэни тутуу Арассыыйа Хотугулуу-Илиҥҥи өттүн, ол иһигэр дойду Бэрэсидьиэнэ Владимир Путин Арассыыйа Арктикатын сайыннарыыга туһуламмыт дьаһалыгар улахан оруоллаах буолуоҕа”, — диэн Айсен Николаев бэлиэтээтэ.
Салгыы кини Сыырдаахха “Саюри” сылы эргиччи үлэлиир тэпилииссэҕэ сырытта. Тэпилииссэ комплексын иккис уочаратын тутуу түмүктэнэн эрэр. Агрономнар хайы-үйэ салааты хомуйдулар, оттон бу ыам ыйыттан маҕаһыыннарга сибиэһэй оҕурсу атыыга тахсыаҕа. Үһүс уочараты тутуу быйыл саҕаланыаҕа.
«Сылы эргиччи үлэлиир тэпилииссэни тутуу туһунан олох соторутааҕыта диэри үгүс мөккүөр тахсыбыта. Оттон билигин бырайыак үлэлээбитин итэҕэйдибит. Дьокуускай куорат олохтоохторун сибиэһэй томатынан, оҕурсунан уонна салаат сэбирдэҕинэн хааччыйар дьоһун агрокластер тэрилиннэ. Бу ордук кыһыҥҥы кэмҥэ улахан суолталаах. Роспотребнадзор ыыппыт чинчийиитинэн, кэлии оҕуруот аһынааҕар бу комплекска үүннэриллибит оҕуруот аһыгар нитрат көрдөрүүтэ намыһах”, — диэтэ өрөспүүбүлүкэ баһылыга.
Капитоновкаҕа Ил Дархан “Хаҥалас” индустриальнай паарка резиденнэрин икки производственнай эбийиэгин көрдө. “Эгопласт” хампаанньа өрөспүүбүлүкэ дьиэ-уот хомунаалынай хаһаайыстыбатын эбийиэктэрин наадыйыытыгар анаан араас уһуннаах уонна диаметрдаах пластик турбалары оҥорууну саҕалаата. “Саха Липснеле” ХЭТ Уһук Хоту дойдуга аналлаах оһох оборудованиетын кэмпилиэгин ахсаанын тыһыынча экземплярга тириэртэ. Хампаанньа соторутааҕыта бу оһохтору Казахстаҥҥа таһаарыыга хантараак түһэрсибитэ. Аны Монголияны кытта сибээһи олохтуур.
Хаҥалас бөһүөлэгэр Айсен Николаев “Сэйбиэм” ювелирнай-кырыылыыр кластер саҥа дьиэтигэр таарыйда.
“Ювелирнай-кырыылыыр кластер резиденнэрэ оҥорон таһаарар улахан баҕалаахтар. Бу тэрилтэлэргэ Хаҥалас (Кангалассы) олохтоохторо үлэҕэ ылыллаллара үөрдэр. Арассыыйа Бэрэсидьиэнин Уһук Илин ФУо боломуочуйалаах бэрэстэбиитэлэ Юрий Петрович Трутнев биһиги этиибитин өйөөтө уонна быйыл Хаҥаласка Уһук Илини сайыннарыы бырагырааматынан уһуйааннаах саҥа оскуола дьиэтин тутуу саҕаланыаҕа. Урутаан сайдар сири-уоту сайыннарыы бырайыактарын олоххо киллэрии түмүгэр Дьокуускай таһынааҕы бөһүөлэктэр – Хаҥалас мкр, Сыырдаах с., Капитоновка с., “Жатай” куораттааҕы уокурук сайдыы саҥа түһүмэҕэр үктэниэхтэрэ, ити Дьокуускай бырамыысыланнас киининэн буоларыгар кыаҕы үөскэтиэҕэ”, — диэтэ бу сырыытын кэнниттэн Саха сирин Ил Дархана Айсен Николаев.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата.