Бүгүн Торт күнүн үгүс хаһаайка үөрэ-көтө бэлиэтиир.
edersaas.ru
Ытык Таатта сириттэн тардыылаах, икки мааны кырачаан күн күбэй ийэтэ, тапталлаах кэргэн Евдокия Попова торт оҥорорун олус сөбүлүүр.
Иллэҥ кэмигэр наһаа минньигэс, кырасыабай көстүүлээх тортары оҥорор. Онон бу дьарыгынан кини дьиэтээҕи дохуотугар эбии харчыланар. Евдокия сакаас ыларын таһынан, ким баҕалааҕы таптыыр дьарыгар эмиэ уһуйар.
— Торт оҥоруунан дьарыктаммытым быйыл үһүс сайыным. Уопсайынан, бурдук аһы астыырбын наһаа сөбүлүүбүн. Торду астыырга интернети хасыһан, биллиилээх кондитердар сүбэлэрин ааҕан бэйэм үөрэммитим. Кылаабынайа, баҕарыаххын эрэ наада, оччоҕо туох барыта табыллар дии саныыбын.
Дьон биһирэбилэ, махтала киһини кынаттыыр. Оттон килийиэннэриҥ ахсаана элбиир буоллаҕына, ол киһи санаатын өссө көтөҕөр уонна сонунтан сонун идиэйэҕэ сирдиир, — диэн Евдокия санаатын үллэстэр.
Ама, бу курдук кэрэ айымньыны ким сөҕө көрүө суоҕай? Торт оҥорор дьарыктаах Евдокия Поповаҕа саҥаттан саҥа кэрэ көстүүлээх уонна минньигэс амтаннаах тортары айа турарыгар баҕарабыт.
Анжелика АЛЕКСЕЕВА, «Саха сирэ» хаһыат, edersaas.ru
Хаартыскалар: Евдокия Попова дьиэтээҕи архыыбыттан