Саха сирин ыччата олус талааннаах. Ырыаһыттары, үҥкүүһүттэри, артыыстары таһынан араас хайысханан уруһуйдуур худуоһунньуктар элбэхтэр. Топпутугар номнуо киэҥник биллибит эдэр худуоһунньуктары кытта саҥа ааттары эмиэ киллэрдибит. Билсиҥ:
Мира Аргунова – @mira_art_ykt
Мираны үгүс дьон “Мира АРТ” диэн бэлиэлээх сахалыы оһуордаах-мандардаах аккырыыккалары уруһуйдаабытынан билэр буолуохтааххыт. Мира былырыын күһүн “Сияние Азии” диэн айар быыстапката Дьокуускайга арыллыбыта. Кини ордук айылҕа көстүүтүн, мэтириэттэри, дириҥ ис хоһоонноох хартыыналары уруһуйдуур.
Семен Луканси – @lukansi
Амматтан төрүттээх эдэр худуоһунньук Саха сирин таһынан, Москваҕа хаста даҕаны уруһуйдарын быыстапкалаабыта. Кини уруһуйун сүрүн тиэмэтэ – саха норуотун култуурата уонна устуоруйата. Семен холустаҕа киһи уонна айылҕа быстыспат ситимин, биллэр дьон мэтириэттэрин уруһуйдуура үгүс дьон болҕомтотун тардар.
Кыыдаана Игнатьева – @kyydaana
Кыыдаана Дьокуускай куорат дьиэлэрин уруһуйдаабытын туһунан элбэхтэ аахпыт, билбит-көрбүт буолуохтааххыт. Кини ааспыт сыл бүтүүтэ бэйэтин айар устуудьуйатын арыйбыта, аны баҕалаах дьону уруһуйга үөрэтэн саҕалаата. Талааннаах кыыс Арассыыйа, аан дойду биллэр дьонун мэтириэттэрин уруһуйдаабыта уонна бэйэлэригэр бэлэхтээбитэ.
Николай Гольдеров – @art_by_golderov
Николай оҕо хаһыатын дьэрэкээн уруһуйдарынан киэргэтэр. Кини “Кэскил”, “Юность Севера” хаһыаттарга үлэлиир. “Киһини уруһуйдуурбун ордоробун. Айылҕаны хайдах даҕаны ойуулаатаххына, син биир айылҕа буолара биллэр. Оттон киһини майгыннатыаххын наада. Биир сурааһыны сыыһа уруһуйдаатаххына, өҥү сөпкө талбатаххына – уруһуйуҥ табыллыбат”, — диир эдэр худуоһунньук.
Маргарита Яковлева – @ri_nasi
Маргарита Үөһээ Бүлүүттэн төрүттээх. Дьоно уруһуйга талааннаах буоланнар, Рита кыра сааһыттан уруһуйдуур, художественнай оскуолаҕа үөрэммит эбит. Онтон Дьокуускайдааҕы художественнай училищены бүтэрбит. Билигин көмпүүтэргэ уруһуйдуур, ону таҥаска түһэртэрэр. Ону таһынан кинигэлэри, аккырыыккалары ойуулуур.
Роман Марков – @artbymarkro
Роман “Тыгын Дархан” киинэҕэ раскадровщигынан уонна худуоһунньугунан үлэлээбитэ. Кини ураты сахалыы тыыннаах хартыыналара сакалаат, чэй хаҕын киэргэтэр. Аны Роман Олоҥхо дьоруойдарын, бухатыырдары уруһуйдуур, комикс гына тыллаан-өстөөн биэрэр.
Саргылана Скрябина – @seagulldesigner
Саргылана Дьокуускайдааҕы художественнай училище “живопись” салаатын уонна Арассыыйатааҕы кинематография судаарыстыбаннай университетын туруорааччы-худуоһунньук идэлээх бүтэрбитэ. Билигин саха киинэтигэр (“Тойон Кыыл”, “Кэрэл”, “Муммуттар”, “Аптаах Дорҕоон” уо.д.а.) үлэлиир. Уруһуйга живопись уонна графика хайысханы ордорор.
Мотрена Нестерева – @__niagamo__
Мотрена акварелинэн уруһуйдуурга «Свет и тень» устуудьуйаҕа үөрэммит. Ол иннинэ боростуой харандааһынан уруһуйдуура. Араас тиэхиньикэни туһанан, ютуб-ханаалы көрөн, саҥаттан-саҥаны боруобалыырын сөпбүлүүр. Мотрена худуоһунньукпун дэнэрим эрдэ, уруһуйдуур киһибин диэн бэйэтин билиһиннэрэр.
Айтана Аммосова, «»Саха сирэ» хаһыат, edersaas.ru