Аан дойдутааҕы кэрэ аҥаардар күннэрин көрсө бүтэһик кэмҥэ дьон болҕомтотугар сылдьар саҥа ааттары таҥныбыт. Кэрэ куолар, эһиги кимнээххитий?
Бүгүн төрөөбүт күннэрин бэлиэтиир, 23 саастарын туолбут игирэ кыргыттар Валерия уонна Виктория Неустроевалар «Инстаграм» социальнай ситимҥэ аҕыйах күнтэн бэттэх биллэн-көстөн бардылар диэн суруйдахпытына сыыспаппыт буолуо. Кыргыттар гитара доҕуһуолунан ыллаан-туойан саха дьонун кутун туттулар. Олохторун, айар үлэлэрин туһунан кэпсиир LeVi диэн «Телеграмҥа» ханааллаахтар. Лералаах Вика Дьааҥы улууһун Боронугуттан төрүттээхтэр, үс саастарыттан сыанаҕа тахсан ыллыыллар эбит. Кинилэр аҕыйах хонуктааҕыта «Саха» НКИХ «Эйгэ» биэриитигэр ыалдьыттаабыттара.
Арктикатааҕы култуура уонна ускуустуба институтун бүтэрбит, билигин Олоҥхо тыйаатырын артыыската Ольга Дорофеева «Инстаграмҥа» 7348 сурутааччылаах. Ольга бу күннэргэ Олоҥхо тыйаатырын сыанатыгар сүрэхтэммит «Улуу Даарын» испэктээккэ биир сүрүн оруолу толордо. Аны үс сыллааҕыта бары оҕо эрдэхпититтэн билэр биэс ынахтаах Бэйбэрикээн эмээхсиммит туһунан остуоруйанан киинэ оҥорбуттарыгар, биһиги дьоруойбут эмиэ биир сүрүн оруолу толорбута. Киинэ иккис чааһа бу ыйга тахсаары турар, онно Ольганы эмиэ көрүөхпүт. Эдэр артыыс блогар олоҕун туһунан суруйар, араас тэрилтэлэри рекламалыыр. Маны таһынан, Ольга бу сыл саҕаланыыта сүүрэн-көтөн, Дьокуускай киинигэр Olimoli Brand диэн таҥас маҕаһыынын арыйан үлэлэтэн эрэр.
«Саха кыыһа Күн ЖАРА Lite шоуга кыттар буолла» диэн сонуну үгүскүт аахпыта буолуо. Күн Алексеева идэтийбит ырыаһыт буолар, оҕо эрдэҕиттэн сахалыы, нууччалыы, английскайдыы ырыа суруйар, ыллыыр. Кини былырыын Гнесиннэр ааттарынан Муусука Арассыыйатааҕы академиятын ситиһиилээхтик бүтэрэн, билигин Эстрада тыйаатырыгар үлэлии, айа-тута сылдьар. Талааннаах кыыс туһунан СахаСтас ютубка видео-подкаһыгар көрүҥ, истиҥ:
Зарьяна Юмшанова, ол эбэтэр Аар Кудай диэн ураты айдарыылаах кэрэ аҥаар туһунан үгүс дьон кэпсэтэр, интэриэһиргиир буолла. Аар Кудай бэйэтин духуобунай настаабынньыкпын, олоҕор мунаахсыйбыт дьоҥҥо көмөлөһөн, суолларын сааһылаан биэрэбин уонна урбаанньыппын диэн билиһиннэрэр. «Икки сыллааҕыта улахан эттэтиини ааспытым, чараас эйгэни кытта чугастык үлэлиибин», — диэн Зарьяна суруналыыс Николь Егороваҕа кэпсээн турар. «Саҥа кэм удаҕана» диэн ааттаах интервьюну көрүҥ:
Вероника Степанова эбэтэр Вероника Касабланка. Маннык ааттаан ырыаһыт кыыһы араас кэнсиэрдэр, айар киэһэлэр биллэриилэригэр билиһиннэрэр буоллулар. Вероника Мэҥэ Хаҥалас Төҥүлүтүттэн төрүттээх, үөрэҕинэн педагог. Кини 2021 сыл бүтүүтэ аатырбыт «Касабланка» ырыаны сахалыы ыллаан дьон кутун-сүрүн тутуон тутта. Ырыаһыт кыыс биир дойдулааҕын Айгылааны настаабынньык оҥостон, билигин ыллыы-туойа, гостуруолларга айанныы сылдьар. Бу соторутааҕыта эмиэ эдэр талаан Иван Лаврентьевы кытта «Олох ааһар…» диэн ырыаларын сүрэхтээбиттэрэ.
Раиса Кириллинаны үгүс дьон «Детсаттар» уһулбут «Таптал» киинэлэригэр биир сүрүн оруолу толорбутунан, КВН-ҥа оонньуурунан билэр буолуохтааххыт. Раиса икки уол оҕолоох ийэ, кэргэн. Инстаграмыгар 26 800 сурутааччылаах, манна кини дьиэ кэргэнин олоҕуттан суруйар, кэпсиир. Раиса доҕотторун кытта 2021 сыл бүтүүтүттэн «Туох сонун?» (бэлиэтэммит сыылканан биэриилэри көрүҥ) диэн биэриини «Инстаграмҥа» ыытар буоллулар. Талааннаах кыыс бу биэриигэ ыытааччы быһыытынан холонон, ыалдьыттарын үгүс сытыы ыйытыыларынан мух-мах ыытар. Биэрии сырыы аайы тупсар, сүгүрүйээччитэ элбиир.
https://www.youtube.com/watch?v=LqcxkKuUO_Q
edersaas.ru
Хаартыскалар интэриниэккэ баар аһаҕас источниктартан туһанылыннылар.