1. Арассыыйа чөмпүйэнээтигэр мадьыныларбыт ситиһиилээхтик кытыннылар.
Кабардино-Балкарскай өрөспүүбүлүкэҕэ ыытылла турар мас-рестлиҥҥэ Арассыыйа чөмпүйэнээтигэр Саха сирин мадьынылара икки кыһыл көмүс, үс үрүҥ көмүс уонна биэс боруонса мэтээллэннилэр. 90 уонна 105 киилэҕэ диэри ыйааһыннарга Павел Черноградскай уонна Дмитрий Попов кыайыы көтөллөннүлэр. Оттон 125 киилэҕэ диэри ыйааһыҥҥа Анатолий Баишев уонна Эрчим Баппаҕай боруонса мэтээллэннилэр. Сиһилии манна ааҕыҥ: https://edersaas.ru/arassyyja-ch/
2. Василий Егоров буоксаҕа Арассыыйа чөмпүйүөнэ буолла.
Бэҕэһээ Оренбург куоракка буоксаҕа Арассыыйа чөмпүйэнээтэ түмүктэнэр. Финалга 27 саастаах саха боксера Василий Егоров финалга ыччакка Арассыыйа чөмпүйүөнэ 22 саастаах Новосибирскайтан сылдьар Ахтем Закировы кыайда. Василий Егоров кыайыылаах курунан, 500 тыһыынча солкуобай харчынан, массыынанан наҕараадаланна. Бэлиэтээн суруйдахха, Егоровтаах Закиров бу иннинэ Арассыыйа Куубагын рингэтигэр күрэхтэспиттэрэ. Онно Василий кыайыыны ситиспитэ.
3. Үөһээ Бүлүү улууһугар Тамалакааҥҥа «Үтүө санаа харыйата» аахсыйа саҕаланна.
Бу нэһилиэк дьаһалтата үгэс курдук сылын аайы Саҥа дьылы көрсө аахсыйа тэрийэр. Тэрээһин Тымныы оҕонньор бэлэҕин күүтэр кырачааннарга ананар. «Бэйэ-бэйэҕэ истиҥ сыһыаннаах, сайаҕас, мындыр өбүгэлэрбит үтүө-мааны үгэстэрин салҕаан, ис сүрэхтэн кэрэни баҕаран туран, бэлэх аҕалан харыйаҕа уураллар. Былырыын элбэх оҕолоох ыаллар кырачааннара ыллаан, хоһоон ааҕан, бэлэхтэри туппуттара. Оттон быйыл, Тымныы оҕонньор дьиэлэри кэрийэ сылдьан туттартыа», — диэн дьаһалта иһитиннэрэр.
4. Айсен Николаев волонтердарга өйдөбүнньүк мэтээллэри уонна грамоталары туттарда.
Айсен Сергеевич ковид ыарыыны кыайар туһугар мэдиссиинэ эйгэтин үлэһиттэригэр көмөлөһөн, «кыһыл зонаҕа» инники күөҥҥэ сылдьар медик-волонтердары бэлиэтээн туран махтал тылларын тиэртэ. Маны сэргэ, Улуу Кыайыы 75 сылыгар анаммыт тэрээһиннэри тэрийиигэ төһөлөөх да уустуктар үөскээбиттэрин иһин, дойдуга бэриниилээх буолуу сылыгар Кыайыы-волонтердара ахсаабат кыһамньыларын ууран элбэҕи оҥорбуттарын тоһоҕолоон бэлиэтээтэ.
5. Чурапчылар аҕам саастаахтарыгар босхо бородууктаны түҥэтэллэр.
Чурапчы улууһугар «Дьиэ кэргэн экэниэмикэтэ» бырайыак чэрчитинэн аҕам саастаахтарга көмөлөһөн, босхо бородуукталары түҥэтэллэр. «Босхо бородуукта нобуорун 17 нэһилиэктэн барыта 250 киһи ылыаҕа. Бу барыта 80 сааһын ааспыт дьон. Нобуор иһигэр саахар, куруппа, мокоруон, мас арыыта, чээй уонна бурдук ас баар», — диэн Чурапчы улууһун дьаһалтатын дьиэ кэргэҥҥэ исписэлииһэ Татьяна Бушкова иһитиннэрэр. Аахсыйаҕа анаан улуус бүддьүөтүттэн харчы көрүллүбүт.
6. Ахсынньы 4 күнүгэр Мииринэйгэ эбии үөрэхтээһин киинигэр ай-ти киин арылынна.
Үөрүүлээх арыллыыга СӨ Бырабыыталыстыбатын бэрэссэдээтэлэ Андрей Тарасенко кыттынна. Кини өрөспүүбүлүкэҕэ цифровизация сайдыытын кытта сонун идиэйэлэрдээх саҥа каадырдарга наадыйыы улаатар диэн бэлиэтээтэ. Ол иһин өрөспүүбүлүкэ бары улуустарыгар ай-ти кииннэр арыллаллара улахан суолталаах. Оттон оройуон баһылыга Ришат Юзмухаметов ай-ти киин Ил Дархан Айсен Николаев стратегическай ыйааҕын көмөтүнэн арыллыбытын эттэ. Кини өрөспүүбүлүкэ бырабыыталыстыбата үп көрбүтүгэр махтанна.
7. Өлөөн оройуона түргэн интэриниэккэ холбонно.
Өлөөн эбэҥки национальнай оройуонугар «Ростелеком» хампаанньа оптоволокно сибээһин лиинийэтин тутуутун түмүктээтэ. Онон, ахсынньы 4 күнүгэр Саха сирин Арктикатын сиригэр бастакынан Өлөөн оройуона оптическай лиинийэҕэ холбонно. Саҥа сибээскэ олохтоохтор Өлөөн улууһун урукку баһылыгын Александр Иванов аатын иҥэрдилэр. Кини бу бырайыак олоххо киирэригэр үгүс сыратын уурбута. ВОЛС уһуна — 432 км.
8. Чурапчы улууһун Төлөй нэһилиэгин А.С.Бродников аатынан «Аартык» Норуот айымньытын дьиэтэ Саҥа дьылы көрсө «Симэммит мааныкай» диэн бэртээхэй тэрээһини ыытта.
Тэрийээччилэр куйаар ситиминэн барбыт күрэскэ өрөспүүбүлүкэ араас муннугуттан хаһаайкалартан ынахтарын симэмээбит хаартыскаларын хомуйдулар. «Симэммит мааныкай» аһаҕас хаартыска куонкуруһун кылаан кыайыылааҕынан Таатта улууһун Баайаҕа олохтооҕо Ольга Бурнашева үс саастаах Оотой уонна Тоотой игирэ оҕустара мотуруос таҥаһын таҥнан кыайыылааҕынан таҕыстылар. Хаартыска аата «Иккиэн бииргэ» диэн.
9. Чуукаар оҕолоро Тымныы оҕонньору түннүгүнэн көрөн, остуоруйаны итэҕэйдилэр.
“Кыһын Саха сириттэн саҕаланар” кыһыҥҥы бэстибээл чэрчитинэн Ньурба улууһун Чуукаар нэһилиэгин норуот айымньытын киинэ Саха сирин араас муннуктарыгар олорор биир дойдулаахтарын куйаар ситиминэн быһа эпииргэ түмтэ. Бу туһунан киин уус-уран салайааччыта Лэкээрин Сэргэн кэпсиир:
— Күнүс үс чаастан саҕалаан, тэрийээччилэр Тымныы Оҕонньору массыынаҕа олордо сылдьан, бары тэрилтэлэри, түөлбэлэри кэрийдибит. Аара дьаһалтаҕа нэһилиэк салалтатын таһырдьа көрсөн, эҕэрдэлээн аастыбыт. Онтон суолбутугар турар оҕо уһуйаанын кыраачааннарын Тымныы оҕонньор түннүгүнэн көрсөн, остуоруйа түгэнин бэлэхтээн ааста. Оҕолор барахсаттар таһырдьа көстөн ааспыт күүтэр да күүтэр күндү Тымныы оҕонньордорун көрөн, наһаа соһуйдулар да, үөрдүлэр да. Биир оҕо таҥнан тахсаат, хоһоон ааҕар киһи буолан биэрдэ. Ол кэнниттэн «Быһа эпииргэ» аһаҕас күрэс түмүктэрин таһаардыбыт. Киэһэ алта чааска: “Биир, икки, үс! Күөх харыйабыт, сандаар!” диэн аптаах этиини бары күргүөмүнэн этэн, нэһилиэкпит Саҥа Дьыллааҕы харыйатын уотун күлүмүрдэтэ уматтыбыт. Бу курдук Чуукаарбытыгар Саҥа дьыл тыына билиннэ!
10. Дьокуускайга Саҥа дьыллааҕы харыйа уота сандаарда!
Ахсынньы 1 күнүгэр «Кыһын Саха сириттэн саҕаланар» бэстибээл иитинэн Дьокуускай куорат Ленин болуоссатыгар Саҥа дьыллааҕы харыйа уота сандаарыччы умайда. Бу алыптаах түгэни кытта тэҥҥэ өрөспүүбүлүкэбит 36 оройуонугар харыйа уота сандаарда. Быйыл коронавирус пандемията туран, «Кыһын Саха сириттэн саҕаланар бэстибээл» онлайн киэбинэн ыытылынна. Онон, өрөспүүбүлүкэ сүрүн харыйатын уота холбонорун теле-эпиир кэмигэр көрдүбүт.
edersaas.ru