1. Саха сиригэр Оҕо аймах академията аһылынна.
Бэҕэһээ, сэтинньи 21 күнүгэр, үөрүүлээх быһыыга-майгыга Дьокуускай куораттааҕы 18-с нүөмэрдээх “Прометейчик” уһуйаан баазатыгар Т.С. Комарова аатынан Оҕо аймах академията аһылынна. Академия сүрүн соругунан социальнай экэниэмикэни күүскэ тарҕатыы, баар кыаҕы, олохсуйбут быраактыканы үөрэх уонна урбаан эйгэтигэр сөпкө туһаныы буолар.
2. Ахсынньы 5-6 күннэригэр Дьокуускайга «Триумф» успуорт комплексыгар «Дыгын оонньуулара» турнир ыытыллар буолла.
Ааспыт сылларга «Дыгын оонньууларыгар» сүүмэрдиир түһүмэхтэр ыытыллан путевкалар оонньонооччулар. Быйыл биллэр төрүөтүнэн бу ыытыллыбата. Быраабыла быһыытынан, бүтэһик оонньуулары кыайбыт Хаҥаластан Егор Филиппов уонна национальнай многоборье чөмпүйэнээтин кыайыылаахтара Кэбээйиттэн Алексей Уваровскай, Ньурбаттан Владимир Федоров быһа кыттар бырааптаахтар.
Оттон өрөспүүбүлүкэ национальнай многоборьеҕа федерацията биллэрбитинэн, бу үс үөһээ ааттаммыт боотуру сэргэ Артем Варданян (Нам), Леонид Филиппов (Амма), Павел Друзьянов (Чурапчы), Алексей Протодьяконов (Томпо), Дьулустаан Ноговицын (Горнай), Николай Матаннанов (Таатта), Айсен Семенов (Өлөөн), Никита Новгородов (Уус Алдан) уонна Егор Свинобоев (Мэҥэ Хаҥалас) күрэхтэһэр буоллулар.
3. Дьокуускай куорат олохтоохторугар маасканы босхо түҥэтиэхтэрэ.
«Капитал Инвест» дириэктэрэ Ксения Марусенко уонна урбаанньыт Михаил Федоров куорат олохтоохторугар 20 тыһыынча маасканы бэлэхтээтилэр. Дьокуускай куорат баһылыгын эбээһинэһин толорооччу Евгений Григорьев иһитиннэрбитинэн, маасканы куорат ЯПАК оптуобустарыгар тиксэрбиттэр. Олору мааската суох киирбит дьоҥҥо биэрэр буолуохтара.
4. Коронавирустаах дьоҥҥо амбулаторнай киин аһыллыаҕа.
Дьокуускайдааҕы 3-с №-дээх балыыһа иһинэн коронавируһу билэргэ, суһаллык буларга амбулаторнай киин арыллан эрэр. Ол эбэтэр, ыалдьыбыт киһи биир сиргэ баран, ПЦР анаалыһы туттарар, көмпүүтэр томографиятыгар түһэр уонна бырааска эмтэниини анатар. Киин күнүстэри-түүннэри үлэлиэҕэ. Кэлэр икки нэдиэлэ иһинэн аһыллара былааннанар. Билигин дьиэтин-уотун бэлэмнии, өрөмүөннүү сылдьаллар.
5. «Cinema Center» эмчиттэргэ киинэни сыана аҥаарыгар көрдөрөр.
Бу сыл бүтүөр диэри эмчиттэр, миэдик-устудьуоннар уонна волонтердар Дьокуускайга баар «Cinema Center» киинэ тыйаатырын киинэлэрин сыана аҥаарыгар көрүөхтэрэ. Бу күннэргэ «GQ» диэн аан дойдуга биллэр сурунаал коронавирус дьаҥын бохсууга үлэлиир эмчиттэргэ «Сыл киһитэ» диэн бириэмийэтин анаата. Онон сибээстээн, Дьокуускайдааҕы «Cinema Center» киинэ тыйаатыра сэтинньи 23 күнүттэн ахсынньы 31 күнүгэр диэри «Быраастар — сыл дьоно-2020» диэн аахсыйаны ыытарын иһитиннэрдэ. «Cinema Center» киинэ тыйаатырыгар нэдиэлэ ханнык баҕар күнүгэр мэдиссиинэ үлэһиттэрэ, волонтердар уонна миэдик-устудьуоннар киинэни 50 % чэпчэтиилээх көрүөхтэрэ.
6. Саха сирэ — «Саамай ааҕар эрэгийиэн»
Сэтинньи 18 күнүгэр бу далааһыннаах куонкуруска кыайыы туоһутун, үрдүк наҕарааданы, анал статуэтканы уонна диплому Сергей Вадимович Степашин СӨ Ил Дарханыгар Айсен Сергеевич Николаевка долгутуулаах түгэҥҥэ туттарыыта умнуллубат кэрэ-бэлиэ түгэнинэн буолла. Ону сэргэ, кини өрөспүүбүлүкэ бибилэтиэкэлэригэр кинигэ пуондатын хаҥатарга анаммыт сэртипикээти СӨ Национальнай бибилэтиэкэтин дириэктэрэ С.М. Максимоваҕа туттарда.
7. Жатай «өйдөөх» дьиэни тутууга дойдуга бастыҥ.
Жатайга бүтэһик хаалбыт саахалланар туруктаах хаарбах дьиэлэри көтүрүү үлэтэ тиһиктээхтик салҕанар. Бөһүөлэккэ маннык дьиэлэри көтүрүү бүтэһик кэрдииһин саҕалыырга Ил Дархан Айсен Николаев Дьокуускайга үлэлэринэн кэлэ сылдьар ОДьКХ-ны реформалааһыҥҥа пуонда кэтээн көрөр сэбиэтин бэрэссэдээтэлэ Сергей Степашины уонна пуонда генеральнай дириэктэрэ Константин Цицины кытары эттилэр.
Трактовая уулуссаҕа турар 1960 сыллааҕы хаарбах туруктаах биир этээстээх тутууну улахан тиэхиньикэ көмөтүнэн көтүрдүлэр. Бу бөһүөлэккэ бүтэһик уон хаарбах туруктаах дьиэттэн биирдэстэрэ. Бу дьиэлэргэ олорбут 193 киһи барыта ууга-уокка ороскуотурдубат ньыманан тутуллубут 69 кыбартыыралаах «өйдөөх» дьиэҕэ көһөллөрүн туһунан бөһүөлэк баһылыга Евгения Исаева иһитиннэрбитэ.
8. Ньурбаҕа кэлэр сыл бэлиэтин муустан оҥордулар.
Ньурба улууһун Чуукаарыгар Н.С. Степанов аатынан Кыайыы болуоссатыгар кэлэр 2021 сыл бэлиэтин — оҕуһу муустан оҥордулар. Бу муус оҥоһугу Герасим Максимов уонна Август Михайлов оҥордулар. Кинилэр муус, хаар оҥоһуктар араас таһымнаах куонкурустарын кыайыылаахтарынан буолаллар эбит.
9. Михаил Мишустин оҕолорго төлөбүр туһунан дьаһалга илии баттаата.
РФ Бырабыыталыстыбатын Бэрэссэдээтэлэ Михаил Мишустин бу нэдиэлэҕэ эмиэ биир суолталаах дьаһалга илии баттаата. Михаил Мишустин 3-тэн 7-гэр диэри саастаах оҕолорго төлөбүргэ 61,8 миллиард солкуобайы ыытар туһунан дьаһалга илии баттаата. Уопсайа 62 миллиард кэриҥэ солкуобай эрэгийиэннэргэ 3-тэн 7-гэр диэри саастаах оҕолорго төлөбүргэ эбии ыытыллыаҕа. Бу туһунан дьаһалга Бырабыыталыстыба Бэрэссэдээтэлэ илии баттаата. Эбии үбүлээһин оҕо ахсаана эбиллибитинэн көрүлүннэ. Билигин маннык төлөбүрү ылар киһи ахсаана 4,2 мөлүйүөҥҥэ тиийдэ.
10. Чурапчы Чакырыгар күөх төлөн кэллэ.
Сэтинньи 16 күнүгэр Чурапчы улууһун Чакырыгар үөрүүлээх уонна улахан суолталаах тэрээһин буолла — нэһилиэк күөх төлөҥҥө холбонно. Бу күнү чакырдар өр даҕаны күүппүүттэрэ. «Чурапчы улууһун күөх төлөҥҥө холбооһун бырайыага 2016 сылтан саҕаламмыта. Нэһилиэк оччотооҕу баһылыга, дьокутаат Татьяна Васильевна Адамова үлэни саҕалаабыта уонна номнуо 2017 сыллаахха бөһүөлэк иһинээҕи турбалар, наадалаах матырыйааллар кэлбиттэрэ. Төһө даҕаны мэһэйдэр баар буолбуттарын иһин, Ил Дархаммыт Айсен Николаев, бырабыыталыстыба, бырамыысыланнас уонна тыа хаһаайыстыбатын министиэристибэлэрин, улуус, нэһилиэк өйөөннөр, бырайыак силигин ситтэ. Чакыр олохтоохторо илэ харахтарынан өрөспүүбүлүкэ салалтата ыытар социальнай бэлиитикэтин үлэтин көрдүлэр», — диэн улуус баһылыга Андрей Ноговицын үөрүүлээх тэрээһиҥҥэ бэлиэтээн тыл эттэ.
edersaas.ru