1. Туприннары «Вернувшиеся» бырайыакка көрдөрдүлэр.
Сэтинньи 6 күнүгэр «ТВ3» ханаалга 2018 сыл алтынньытыгар ырыаһыт Кэрэчээнэ Туприна аҕатын уонна кини доҕорун кытта Анаабыр оройуонугар муммуттарын туһунан «Вернувшиеся» бырайыакка документальнай биэрии оҥорон көрдөрдүлэр. Биэриини ханаал үлэһиттэрэ балаҕан ыйыгар Саха сиригэр кэлэн уһулбуттара. Манна игирэ Кэрэчээнэ уонна Кэскилээнэ Туприналары кытта кинилэр тустарынан кинигэ суруйбут Любовь Готовцева уонна Ил Дархан Айсен Николаев көһүннүлэр.
2. Нам Таастааҕар саҥа хотон үлэҕэ киирдэ.
Сэтинньи 6 күнүгэр Нам улууһун Таастаах нэһилиэгэр саха ынаҕар анаммыт 150 миэстэлээх хотон үлэҕэ киирдэ. Тэрээһиҥҥэ СӨ Тыатын хаһаайыстыбатын миниистирэ Александр Атласов уонна миниистири солбуйааччы Николай Афанасьев кыттыыны ыллылар. СӨ тыа хаһаайыстыбатын министиэристибэтэ Дьоһун дьонноох дьоҕус кэлэктиип өр сыллаах туруорсуута олоххо киирэн, аныгы үйэҕэ эппиэттиир толору механизациялаах хотон тутуллан, Таастаахтар үөрүүлээх үгүс. Манна билиҥҥитэ 172 төбө саха ынахтаахтар, онтон ыанар ынаҕа — 52.
3. Чурапчы ыала Таныковтар Путинтан уордьанынан наҕараадаланнылар.
Арассыыйа Бэрэсидьиэнэ Владимир Путин ыйааҕынан, Чурапчы улууһун олохтоохторо Адам уонна Евдокия Таныковтар дьиэ кэргэн укулаатын бөҕөргөтүү, оҕону дьоһун дьон гына иитии иһин, «Төрөппүт албан аата» («Родительская слава») уордьанынан наҕараадаланнылар.
4. Сьюзи Крейт кыыһынаан Эмиэрикэттэн сахалыы эҕэрдэлээтилэр.
Сомоҕолоһуу күнүнэн Сунтаар улууһун Элгээйи нэһилиэгин олохтоохторун ыраах Эмиэрикэттэн кийииттэрэ Сьюзи Крейт уонна кини кыыһа Кэтрин-Туйаара куйаар нөҥүө эҕэрдэлэрин ыыппыттара социальнай ситимнэринэн тарҕанна. Ийэлээх кыыс олус сэргэхтик биир дойдулаахтарыгар туһаайан маннык эҕэрдэни тиэртилэр: «Күндү Элгээйи олохтоохторо уонна ыалдьыттара! Биһиги ыраах дойдуттан эһигини барыгытын Сомоҕолоһуу күнүнэн итиитик-истиҥник ис сүрэхпититтэн эҕэрдэлиибит! Эйэлээх сомоҕо эрэ элбэҕи ситиһэр, үүнэр, сайдар, киэҥ билиилээх кэрэни кэрэхсиир, сырдыкка тардыһар, элбэҕи тутар-айар. Билиҥҥи кэмҥэ сомоҕо олус наадалаах. Доруобай буолуҥ, дьоллоох буолуҥ!»
5. Сэтинньи 4 күнүгэр «Тыгын Дархан» киинэ сүрэхтэннэ.
Сэтинньи 4 күнүгэр Саха сирин бары киинэ тыйаатырдарыгар өр күүппүт «Тыгын Дархан» киинэбит сүрэхтэннэ. Киинэни режиссер Никита Аржаков Василий Яковлев-Далан арамааныгар олоҕуран уһулла. Сүрүн оруолу Таатта Баайаҕатыттан төрүттээх Ньургун Бэчигэн толордо.
6. «Хаҥалас-Ас» 300-тэн тахса ас-үөл нобуорун түҥэттэ.
Хааччахтааһын эрэсиимэ биллэриллиэҕиттэн, Хаҥалас улууһун нэһилиэнньэлээх пууннарыгар «Мы вместе» аахсыйа кыттыылаахтара, волонтердар үлэлииллэр. Аахсыйаҕа орто уонна дьоҕус биисинэс бэрэстэбиитэллэрэ кытталлар. Олортон саамай көхтөөх партнерунан «Хаҥалас-Ас» ТХПК кэлэктиибэ буолар. Бу күннэргэ аахсыйа үлэтин салгыы ыытан, «Хаҥалас-Ас» үүт аһылыгы уонна мүөтү буор босхо нэһилиэктэринэн түҥэттэ.
7. Ньурба дьаһалтата улуус балыыһатыгар «Лада Гранта» массыына күлүүһүн туттарда.
Сэтинньи 2 күнүгэр Ньурба улууһун баһылыга Алексей Иннокентьев Киин балыыһа кылаабынай бырааһыгар Наталья Павловаҕа сабыс саҥа «Лада Гранта» массыына күлүүһүн туттарда. Бу ыарахан кэмҥэ мэдиктэр коронавирус дьаҥын утары охсуһууга бары күүстэрин уураллар. Ыарыһах ахсаана элбээн, быраастары дьиэҕэ ыҥыртарыы элбээтэ. Онон эпидбиригээдэ хара түүҥҥэ диэри үлэлиир. Алексей Михайлович саҥа массыына балыыһа үлэтигэр улахан көмөлөөх буолуо диэн эттэ.
8. Илимнииргэ аҕыс кыбартыыралаах дьиэ тутуллар.
Сэтинньи 2 күнүгэр Сунтаар улууһун Аҕа баһылыга Анатолий Григорьев, тутуу комплексын управлениетын салайааччыта Иван Егоров уонна тыа хаһаайыстыбатын управлениетын салайааччытын солбуйааччы Прокопий Никитин Илимниир уонна Бордоҥ нэһилиэктэригэр саҥа тутулла турар эбийиэктэргэ үлэ хаамыытын билистилэр. Илимнииргэ нэһилиэк килбэйэр киинигэр «Переселение из ветхого и аварийного жилья» бырагыраама чэрчитинэн аҕыс кыбартыыралаах толору хааччыллыылаах таас дьиэ тутуллар. Эбийиэккэ «Сунтарэнерго» ХЭТ тэрилтэ тутууну ыытар, былаан быһыытынан быйыл түөрт квартира бэлэм буолан үлэҕэ киириэхтээх.
9. Рамир Николаев Арассыыйа куубагын чөмпүйүөнэ буолла.
14 саастаах Рамир Николаев спортинг-компакт көрүҥҥэ Тольятига ыытыллыбыт Арассыыйа куубагар кыһыл көмүс мэтээли ылары ситистэ. Рамир Николаев 2020 сылга кыттыбыт күрэхтэһиилэригэр барытыгар кыайан, Арассыыйа бастыҥ ытааччыларын рейтинигэр бастаата. Өрөспүүбүлүкэ сүүмэрдэммит хамаандатыгар Нонна Миронова киирэн, 200 сыалтан 147-тин табан, үрүҥ көмүс мэтээли ылла. Итиэннэ «А» категорияҕа Артур Николаев, Николай Кобяков, «В» категорияҕа Иван Ли-Фу-Сай уонна Евгений Иванов ситиһиилээхтик кытыннылар.
10. Нам гимназиятын үөрэнээччилэрэ үтүө дьыалаҕа кыттыстылар.
Н.С. Охлопков аатынан Намнааҕы гимназия үөрэнээччилэрэ кыһыҥҥы каникулу баттаһа араас ас-үөл наборун хомуйан, дьиэ кэргэн уонна ыччат политикатын отделыгар аҕалан туттардылар. Хомуллубут бородуукта наборун сэтинньи 1 күнүгэр отдел начаалынньыга Екатерина Евстафьева уонна ыччат исписэлииһэ Марат Петров Нам сэлиэнньэтин элбэх оҕолоох уонна кыаммат ыалларыгар тарҕаттылар. Бородуукта туппут ыаллар улуустааҕы гимназия үөрэнээччилэригэр махталларын тиэртилэр. Маннык үтүө дьыала тэриллэрэ хайҕаллаах суол.
edersaas.ru