1. «Вернувшиеся» бырайыакка икки ый туундараҕа муна сылдьыбыт Усуйаана табаһытынан көрдөрдүлэр.
Икки ый туундараҕа муна сылдьыбыт Егор Кривошапкин туһунан ТВ-3 ханаал биэрии уһулан, алтынньы 30 көрдөрдө. Усуйаана табаһыта Егор Кривошапкин 2019 сыллаахха Депутатскайтан табалар турар сирдэригэр бараары муммута.
Кини туһунан «Вернувшиеся» бырайыак биэриитин көрүҥ:
2. Аммаҕа Саҥа дьыллааҕы харыйаны туруордулар.
Алтынньы 29 күнүгэр Амма улууһугар Саҥа дьыллааҕы харыйаны туруора сылдьалларын хаартыскаҕа түһэрэн, аммалар «телеграмҥа» баар ханаалларыгар таһаардылар.
3. Дьокуускай эдэр режиссера Максим Арбугаев «Бой» диэн документальнай киинэтэ Ыччат национальнай киинэ бириэмийэтин шорт-лииһигэр киирдэ.
Максим Арбугаев киинэтэ «Бастыҥ документальнай киинэ» номинация испииһэгэр иккиһинэн турар. Бириэмийэ кыайыылаахтарын Москваҕа ахсынньы 3 күнүгэр биллэриэхтэрэ. «Бастыҥ үлэлээхтэр норуоттар икки ардыларынааҕы киинэ бэстибээлигэр кыттар кыахтаныахтара. Оттон биһиги бириэмийэбитигэр кыайбыт киинэни БРИКС дойдуларыгар — Бразилия, Арассыыйаҕа, Индияҕа, Кытайга, Соҕуруу Африкаҕа көрдөрүөхтэрэ,» — диэн тэрийээччилэр иһитиннэрбиттэрэ.
4. «Тыгын Дархан» киинэҕэ билиэттэр атыыга таҕыстылар.
Алтынньы 28 күнүгэр «Тыгын Дархан» историческай киинэҕэ билиэттэр атыыга таҕыстылар. Ол курдук саҥа киинэни «Лена» киинэ тыйаатырыгар көрүөххэ сөп. Режиссер Никита Аржаков киинэтин «Лена» киинэ тыйаатырыгар сэтинньи 4 күнүттэн саҕалаан 11 күнүгэр диэри 10:00, 13:00, 15:50, 18:40, 21:30 чаастартан көрдөрүөхтэрэ.
Билсэр төлөпүөннэр: 700-811, 36-09-09.
5. Бүлүүгэ күүтүүлээх дендропаарка уонна «Хомустаах» ыллык аһылынна.
Бу астына-дуоһуйа сынньанарга, сибиэһэй салгыны ыймахтыырга, төрөөбүт сирбит-уоппут айылҕатын ураты намчытын, ханна да хатыламмат кэрэтин көрдөрөр ураты паарка. Манна өссө экологическай ыллык анаан-минээн оҥоһулунна. Ыллык айылҕа нарынын-намчытын, араас кыыл-сүөл туһунан кэпсиир, көрдөрөр истиэндэнэн арыалланар. Дендропаарка «Бүлүү күөх кура» пуонда көҕүлээһининэн тэриллибитэ. Олохтоох салалта уонна дьон-сэргэ тута өйөөбүттэрэ. Тэрийээччилэр нэһилиэнньэни бу паарканы тупсарарга, талах, мас арааһын дэлэччи олордорго көхтөөхтүк кытталларыгар ыҥыраллар.
6. Москваҕа ыытыллыбыт устудьуоннар бойобуой ускуустубаҕа аһаҕас күрэхтэһиилэриттэн, Саха сирин спортсменнара кыһыл көмүс уонна боруонса мэтээллэрдээх кэллилэр.
Москваҕа педагогическай университет баазатыгар үс күн устатыгар кикбоксиҥҥа, айкидоҕа, мас тардыһыытыгар күрэхтэһии ыытыллыбыт. Барыта икки сүүскэ чугаһыыр спортсмен кыттыбыт. Ол гынан баран, биир сиргэ элбэх киһини түмпэт туһуттан, күрэхтэһээччилэр ахсааннара хааччахтаммыт. Сайаапканан Москва, Владимирскай, Смоленскай уобаластарыттан, Саха сириттэн кыттыыны ылбыттар. Манна 70 киилэ ыйааһыннаахтарга ХИФУ устудьуоннара Дмитрий Ноев кыайда, оттон Эрэл Сивцев ситиһиилээхтик күрэхтэстэ.
7. Чурапчы олохтооҕо успуордунан дьарыктанарга анаан, дьиэтигэр анал тэрили (тренажер) оҥорбут. Адам Таныков бу оҥоһугун «Адам кирилиэһэ» диэбиттэр.
«Бу элбэх хайысхалаах кирилиэс киһи эргиччи сайдарыгар, этин-сиинин эрчийэригэр, сэниэлэнэригэр, күүстэнэригэр-уохтанарыгар, сыыдамсыйарыгар, өй-санаа да өттүнэн тулуурдаах, толкуйдаах, түргэн-тарҕан буоларыгар көмөлөөх. Манна оҕолор эрэ буолбакка, улахан да дьон дьарыктаныахтарын сөп. Истиэнэҕэ иилэн, иҥиннэрэн туруорары таһынан, атаҕар туруоран баран, хос ортотугар да, муннукка да, ханна баҕарар туруоран кэбиһэҕин. Манна дьарыктаннахха киһи этэ-сиинэ кытаатар, былчыҥ сайдар, толкуйдуур дьоҕуруҥ эмиэ сытыыланар. Өссө волейбол корзинатын иилэн баран, ыраахтан мээчиги быраҕа үөрэнэҕин. Уопсайынан, эргиччи туһалаах», — диэн Адам Таныков быһаарбыт.
8. Былырыын сайын 10 кылаас үөрэнээччитэ Тимофей Степанов Сунтаарга пляжка сөтүөлүү сылдьан, уоллаах аҕаны өлөр өлүүттэн быыһаан, хорсун быһыыны оҥорбута. Бу күннэргэ Тимофей Степановы «Хорсун быһыы иһин» РФ Федеральнай Мунньаҕын мэтээлинэн наҕараадалаатылар.
Былырыын бэс ыйыгар Сунтаар сэлиэнньэтин сөтүөлүүр сиригэр Тимофей Степанов ууга тимирэн эрэр дьону көрөөт, өйүн сүтэрбит уолу быыһыыр. Тутатына аны быыһаммыт оҕо аҕатын ууттан таһаарар. Наҕараадалааһын кэмигэр сулууспа генерал-майора Павел Гарин хорсун уолу тус бэйэтин уонна салалтатын аатыттан махталын тириэртэ.
9. Сэтинньигэ ТНТ телеханаалга Дятлов дабаанын кистэлэҥнэрин туһунан сериал көстөрө күүтүллэр. Киинэҕэ биир дойдулаахпыт, Үүнэр көлүөнэ тыйаатырын артыыһа Георгий Бессонов оонньуур.
1959 сыллаахха олунньуга Свердловскай уобаласка Игорь Дятлов салайааччылаах сылдьыбыт 9 турист өлүгэ булуллубута. Кинилэр туохтан өлбүттэрэ билиҥҥэ диэри быһаарылла илик. Сериал режиссердара, продюсердара Евгений Никишов, Валерий Федорович уонна сценарист Илья Куликов киэҥ араҥаҕа биллэ илик матырыйаалларынан, өлбүт устудьуоннар дневниктарынан үлэлээтилэр.
10. СӨ Ыччатын Бырабыыталыстыбата 2019-2020 сыллар түмүктэринэн Арассыыйаҕа бастыҥынан ааттанна. Маны сэргэ тэриллии РФ ыччат бырабыыталыстыбаларын ассоциацияларын XII сийиэһигэр бырайыагынан үлэҕэ бастыҥынан биллэрилиннэ.
Итиэннэ тэрээһин кэмигэр СӨ Ыччатын бырабыыталыстыбатын бэрэссэдээтэлин Василина Лукинаны федеральнай ассоциация бэрэссэдээтэлин солбуйааччынан таллылар. Кини Уһук Илиҥҥэ баар ыччат бырабыыталыстыбаларын боппуруостарынан, Арктика сайдыытыгар ыччаты кыттыһыннарыыга үлэлэһиэҕэ.
edersaas.ru