ТОП-10: Ааспыт нэдиэлэ уон бастыҥ сонуна
· - Олох-дьаһах

ТОП-10: Ааспыт нэдиэлэ уон бастыҥ сонуна

1. Үөһээ Бүлүү спортсмена Богдан Прокопьев Арассыыйаҕа пауэрлифтиҥҥэ иккис миэстэни ылла.

 

Тулаҕа Арассыыйа кубогар күрэхтэһии буолбут. Пауэрлифтинг күрэхтэһиитэ хас да көрүҥтэн турбут. Сытан эрэ штанганы өрө анньыыга, классическай өрө анньыыга, троеборьеҕа уонна классическай троеборьеҕа. Классическай троеборьеҕа Саха сириттэн сылдьар Богдан Прокопьевы сонно бэлиэтии көрбүттэр. Штанганы өрө анньан турууга, юниордарга кини Арассыыйа рекордун олохтообут. Троеборье түмүгүнэн, Богдан Арассыыйа Кубогын үрүҥ көмүс мэтээлинэн наҕараадаламмыт.

2. Бу күннэргэ Өймөкөөҥҥө Кыайыы искибиэрин үөрүүлээхтик аһыы сиэрэ-туома  буолла.

 

Тупсаҕай оҥоһуулаах нэһилиэк киинигэр турар искибиэр Өймөкөөн улууһун  — 100, Улуу Кыайыы 75 сылларыгар анаан саҥардылынна. Өймөкөөн  Тымныы полюһун быһыытынан, туризм сайдыбыт түөлбэтинэн биллэр. Манна араас омук дойдуларыттан тоҕуоруһа мусталлар. Туристар нэһилиэк бэлиэ миэстэлэригэр хайаан да сылдьан ааһаллар. 285 сэрии уонна тыыл бэтэрээнэ, үлэ фронун кыттыылаахтара, сэрии сылын оҕолорун ааттара көмүс буукубанан нууччалыы, английскайдыы тылынан суруллан,  үс улахан истиэндэҕэ үйэтилиннилэр.

3. Дмитрий Давыдов устубут “Пугало” киинэтэ улахан бэстибээл биир сүрүн наҕараадатын ылла.  

 

Алтынньы 16 күнүгэр Владивосток куоракка уон ахсыс сылын ыытыллар “Меридианы Тихого” бэстибээлгэ “Көрөөччүлэр биһирэбиллэрэ” наҕараада хаһаайынынан буолла. Бирииһи киинэ сүрүн дьоруойа, эстрада тыйаатырын артыыската Валентина Романова-Чыскыырай сыанаҕа тахсан ылла. Бу бэстибээл Чуумпу акыйаан кытыытынан тайаан сытар дойдулар икки ардыларыгар 2003 сылтан ыытыллар.  Уһук Илиҥҥэ биир саамай биллэр улахан тэрээһин. Быйыл 49 дойдуттан 200 киинэ көрдөрүллүбүт. Онон “Пугало” элбэх кыттааччыттан талыллан биһирэбили ылбыта дьоһун.

4. Эдэр табаһыттар биир мөлүйүөннүү солкуобайы ыллылар.

 

СӨ Тыа хаһаайыстыбатын миниистирэ Александр Атласов быһа эпиир кэмигэр эрэгийиэн эдэр табаһыттарын өйүүр бырагыраама туһунан иһитиннэрдэ. «Арктика 13 оройуонугар олорор таба иитиитинэн түөрт сылтан итэҕэһэ суох дьарыктанар 35 сааһын туола илик дьоҥҥо төлөбүр көрүллэр. Төлөбүр биирдэ эрэ бэриллэр. Эдэр табаһыт биэс сыл устата тустаах хайысха сайдарыгар үлэлиэхтээх. Бу үп эдэр киһи табанан дьарыктанар оройуонугар олорор усулуобуйатын тупсарарыгар көрүллэр«, — диэн миниистир быһаарда.

Кини этэринэн, Саха сирин судаарыстыбаннай бүддьүөтүгэр 11 мөлүйүөн солкуобай 11 киһиэхэ биирдии мөлүйүөнүнэн бэриллэригэр көрүллүбүт. Онон, номнуо 11 табаһыт бу бырагыраамаҕа хапсан, тустаах үптэрин ылбыттар.

5. Нам улууһун Түбэтиттэн сылдьар эдэр урбаанньыт Николай Попов «Бастакы» ханаал ыытар «Поле чудес» биэриитигэр кытынна.

 

Николайы кытта бииргэ төрөөбүт быраата  Дьокуускайдааҕы музыкальнай кэллиэс устудьуона Петр Попов барса сырытта. Николай: «Поле чудес» 30 сыллаах үбүлүөйдээх биэриитигэр кытынным. Маныаха саайтарыгар киирэн сайаапка толорон ыыппытым. Саха сирин дьоһуннаахтык билиһиннэрдим дии санаатым. Быраатым Петя тойуктаан, сахалыы ыллаан иһитиннэрдэ. Олус сэргээтилэр, Саха сирин култууратын, олоҕун-дьаһаҕын интэриэһиргииллэр эбит», — диэн санаатын биһиги саайтпытыгар үллэстибитэ.

Саха уолаттара кыттыылаах биэрии бу ый 23 күнүгэр «Бастакы» ханаалга көстүөҕэ.

6. Бу ыйга икки коррекционнай оскуола «Үөрэхтээһин» национальнай бырайыагынан, аныгы ирдэбилгэ эппиэттиир мастарыскыайданыа.

 

Бу ыйга икки коррекционнай оскуола «Үөрэхтээһин» национальнай бырайыагынан, аныгы ирдэбилгэ эппиэттиир мастарыскыайданыа. Тулаайах уонна төрөппүт көрүүтэ-истиитэ суох хаалбыт оҕолор өрөспүүбүлүкэтээҕи анал (коррекционнай) оскуола-интэринээттэрин уонна анал (коррекционнай) оскуола-интэринээттэрин материальнай-тэхиньиичэскэй баазалара «Үөрэхтээһин» национальнай бырайыагынан тупсарыллар.

Санатан эттэххэ, «Үөрэхтээһин» национальнай бырайыагынан, 2024 сылга диэри 14 коррекционнай оскуолаҕа аныгылыы үлэ мастарыскыайдара тэриллэллэр. Бу «Аныгы оскуола» диэн федеральнай бырайыак чэрчитинэн киирэр. Быйыл саҥардан биэрэргэ 15 мөлүйүөнтэн тахса солкуобай үп көрүллүбүт.

7. Дьокуускайдааҕы мөлтөхтүк көрөр оҕолор оскуолаларын тохсус кылааһын үөрэнээччитэ Айыылаана Степанова Москваҕа норуоттар икки ардыларынааҕы «Белая трость» бэстибээлгэ кытынна.

 

Үгэскэ кубулуйбут бэстибээл бэҕэһээ, алтынньы 14 күнүгэр, «Русская песня» тыйаатырга буолла. Кыттааччылары дойду бэрэсидьиэнэ Владимир Путин эҕэрдэлээн, бэстибээл оҕолор баҕа санааларын толорорун бэлиэтээтэ. Айыылаана Степанова тэрээһиҥҥэ РФ үтүөлээх артыыһа Анита Цойу кытта «Неисправимая» ырыаны толордо.

8. Саха сирин артыыстара «Бансу» байыаннай драмаҕа уһуллаллар.

 

Алтайга Акташ сэлиэнньэтигэр Илья Бояшов сэһэнинэн «Бансу» киинэни устуу саҕаламмыт. Киинэҕэ 1943 сыллаахха Аляскаҕа буолбут устуоруйа кэпсэнэр. Сэбиэскэй экипаж АХШ-тан көтөн иһэн, Ном куоракка (Аляска) сапараапкаланаары түһэр уонна туох да суола-ииһэ суох кистэлэҥ докумуоннардаах суумканы илдьэ сылдьар штурманнарын сүтэрэллэр. Кинини көрдүү икки бөлөх барар. Киинэ режиссера Павел Костомаров, «Чернобыль. Зона отчуждения», «Эпидемия», о.д.а. сериалларынан киэҥник биллэр.

Үөрүүлээҕэ, Арассыыйа биллиилээх артыыстарын кытары бу киинэҕэ Саха сирин артыыстара: Былатыан Ойуунускай аатынан Саха академическай драматическай тыйаатырын артыыһа, РФ үтүөлээх артыыһа, СӨ норуодунай артыыһа Герасим Васильев, С.А.Зверев-Кыыл Уолун аатынан национальнай үҥкүү тыйаатырын артыыһа, РФ үтүөлээх артыыһа, СӨ норуодунай артыыһа Дмитрий Артемьев уонна Үүнэр көлүөнэ тыйаатырын артыыһа, СӨ Култууратын туйгуна Георгий Бессонов оонньууллар.

9. Сылы эргиччи үлэлиир «Саюри» тэпилииссэ комплекса  тэпилииссэлэри тутуу инновационнай бырайыактарыгар бастыҥынан ааттанна.

Маннык быһаарыыны «Защищенный грунт России» анал быыстапка иитинэн ыытыллыбыт «Арассыыйа тэпилииссэлэрэ» Ассоциация тэрийбит куонкуруһун дьүүллүүр сүбэтэ оҥордо. «Арассыыйа тэпилииссэлэрэ» Ассоциация генеральнай дириэктэрэ Наталия Рогова бэлиэтээбитинэн, бу тэпилииссэ комплекса тымныы, ирбэт тоҥноох Уһук Хотугу сиргэ инновационнай технологиянан тутуллубута, уһулуччу ураты бырайыагынан буолар.

10. Бэтэрээннэри дьиэлииргэ 1 миллиард көрүлүннэ.

 

РФ бырабыыталыстыбата 1 миллиартан тахса солкуобайы сэрии бэтэрээннэрин олорор усулуобуйаларын тупсарыыга ыытта. Ол туһунан уураахха Михаил Мишустин илии баттаата. Бу харчыны 65 эрэгийиэн бары ылыа. Саамай элбэх үбүлээһин Ростовскай уобаласка, Башкортостан Өрөспүүбүлүкэтигэр уонна Санкт-Петербург куоракка көрүлүннэ.

Саха сирэ 9 мөлүйүөн 793 тыһыынча солкуобайы ылыаҕа. Өрөспүүбүлүкэ сэрии бэтэрээннэрин дьиэнэн хааччыйыыга үчүгэй көрдөрүүлээх. Дойду үрдүнэн олорор усулуобуйаны тупсарыы учуотугар турбут 607 сэрии бэтэрээнэ саҥа кыбартыыраҕа киирэр кыахтаныа.

edersaas.ru

1
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

1 + 10 =