ТОП-10: Ааспыт нэдиэлэ уон бастыҥ сонуна

Бөлөххө киир:

1. «Россия глазами иностранца» шоу иккис сезона таҕыста. Манна Саха сиригэр Марокко устудьуона ыалдьыттаабытын туһунан кэпсээтилэр.

Мароккоттан сылдьар устудьуон Камал Зуани үс күн саха ыалын кытта олорон, биһиги култуурабытын, үлэбитин-хамнаспытын кытта билистэ. Шоу By Foreigners диэн ютуб-ханаага балаҕан ыйын 10 күнүгэр таҕыста. Кини Саха сиригэр кэлэн уоту хайдах аһатарбытын, балыктыырбытын көрдө-иһиттэ. Маны сэргэ кини хомустаата уонна хабарҕа ырыатын ыллаата.

2. Чурапчы улууһун олохтооҕо  Иннокентий Новгородов  дельтаплан оҥорон биир дойдулаахтарын сөхтөрдө. Кини араас техниканы оҥоруунан номнуо дьарыктаммыта отучча сыл буолбут.

— Маннык көтөр аппарааты аан бастакыбын оҥордум. ЛМЗ-250 мотуору сакааһынан оҥотторбутум.  Бу күннэргэ бэртээхэй күннэр тураннар аан бастакытын дельтапламмын көтүттүм. Бу Чурапчыга бастакы дельтаплан, — диэн маастар кэпсиир. Чурапчы устуоруйатыгар дельтапланынан бастакы көтүү буолан элбэх киһи тоҕуоруста диэн улуус дьаһалтатын пресс-сулууспата иһитиннэрдэ.

3. Арктикатааҕы агротехнологическай университет Өктөмнөөҕү филиалын устудьуоннара РФ бырабыыталыстыбатын истипиэндьийээттэринэн буоллулар.

Бу истипиэндьийэ үрдүк үөрэх кыһа иһинэн баар орто үөрэх устудьуоннарыгар ананар. АГАТУ Өктөмнөөҕү филиалын устудьуоннара Герасим Афанасьев уонна Данил Шестаков «Тыа хаһаайыстыбатын механизацията» диэн идэҕэ үһүс кууруска үөрэнэллэр. Кинилэр истипиэндьийэ бэриллэр ирдэбиллэригэр барытыгар толору эппиэттииллэр. Ол курдук, уолаттар иккиэн туйгун үөрэхтээхтэр, уопсастыбынньыктар, араас таһымнаах күрэхтэһиилэр призердара буолаллар.

4. Икки киинэ бырайыага федеральнай үбүлээһини ылары ситистэ. “Сахафильм” икки киинэтин бырайыага Арассыыйа култууратын министиэристибэтэ ыытар питчинг-күрэс финалыгар тиийдилэр.

Ол аата, федеральнай бүддьүөттэн үбүлэнэр кыахтаннылар. Режиссер Любовь Борисова “Уйбаана суох миигин кистээмэҥ” диэн оробуочай ааттаах сценарийа сотору кэминэн үбүлэниэхтээх. Эдуард Новиков “Холбуур ситим” диэн ааттаах үлэтэ резервэҕэ угулунна, ол аата, сыл бүтэһигэр хаалбыт пуондаттан үбүлэнэр. Бу ситиһии саха киинэтин оҥорууну, устууну саҥа таһымҥа таһаарара саарбаҕа суох.

5. ХИФУ устудьуона Арассыыйа успуордун маастарын нормативын толордо. Московскай уобалас Вороновскай бөһүөлэгэр спортивнай хаамыыга Арассыыйа чөмпүйэнээтэ түмүктэннэ.

Манна М.К. Аммосов аатынан Хотугулуу-Илиҥҥи федеральнай университет физическэй култуураҕа уонна успуорка институтун иккис кууруһун устудьуона Пелагея Григорьева ситиһиилээхтик кытынна. Пелагея ыччаттар ортолоругар 20 км уһуҥҥа хааман, төрдүс миэстэ буолла уонна чэпчэки атлетикаҕа Арассыыйа успуордун маастарын нуорматын толордо. Бу маннык уһуҥҥа кини иккис күрэхтэһиитэ буолар.

6. Балаҕан ыйын 10 күнүгэр Нерюнгрига Инаглинскайдааҕы таас чоҕу хостуур шахта бастакы уочарата үлэҕэ киирдэ. 

«Колмар» хампаанньа таас чоҕу хостуур уонна оҥорон таһаарар тутуулара бүгүн, балаҕан ыйын 10 күнүгэр, үлэҕэ киирдилэр. Манна шахтаны сэргэ фабрика арылынна. Бу саҥа эбийиэк сылга алта туонна чоҕу оҥорор таһаарар кыахтаах. Үөрүүлээх тэрээһиҥҥэ Саха Өрөспүүбүлүкэтин Ил Дархана Айсен Николаев кыттыыны ылла. Кини эбийиэктэр үлэҕэ киириилэрин Нерюнгри, Саха сирин эрэ буолбакка, бүтүн дойдубут устуоруйатыгар хаалар бэлиэ күн буоларын эттэ.

7. Перинатальнай киин 10 бастыҥ иһигэр киирдэ. Өрөспүүбүлүкэтээҕи килиниичэскэй балыыһа Перинатальнай киинэ Арассыыйа 10 бастыҥнарын иһигэр киирдэ.

Перинатальнай киин кылаабынай бырааһын солбуйааччы Данара Донская төлөпүөнүнэн иһитиннэрбитинэн, Арассыыйа Перинатальнай кииннэригэр алтыс сылын маннык тэрээһин ыытыллар. Дьокуускайга Перинатальнай киин 2018 сыллаахха аһыллыбыта, Саха сирин дэлэгээссийэтэ бу сыл сэминээргэ бастакытын кыттыбыта.

8. Аан дойдуга биллэр киинэ артыыһа Чак Норрис Дьокуускай олохтоохторун куорат төрөөбүт күнүнэн эҕэрдэлээтэ. 

Чак Норрис ааспыт үйэ ортото «Крутой Уокер» киинэҕэ уһуллан аан дойду билиниитин ылбыта. Саха урбаанньыта Арсен Томскай  «Инстаграмыгар» артыыс эҕэрдэтин таһааран бар дьонун соһутта да, үөртэ да.

9. Сардаана Саввина уонна Семен Шишигин Барнаулга «Бастыҥ продюсер» аатын сүктүлэр.

Балаҕан ыйын 5 күнүгэр Барнаулга Шукшин аатынан Бүтүн Арассыыйатааҕы киинэ ХХІІ бэстибээлэ түмүктэннэ. Бэстибээлгэ кыттыбыт Дмитрий Давыдов «Ийэкээм» киинэтэ «Бастыҥ продюсерскай үлэ» номинацияҕа кыайан, продюсердар Сардаана Саввина уонна Семен Шишигин туйгун үлэлэрэ бэлиэтэннэ. Киинэни, уопсайынан, көрөөччүлэр олус биһирээтилэр, истиҥник көрүстүлэр диэн Саха сирин култууратын пресс-киинэ иһитиннэрэр.

10. Таатта улууһун Дьохсоҕонугар балаҕан ыйын 7 күнүгэр саха норуотун күөн туттар ытык, улуу киһитигэр Өксөкүлээх Өлөксөйгө анаммыт саҥа искибиэри арыйдылар.

Аалай кыһыл лиэнтэни быһыы долгутуулаах түгэнин кэнниттэн улуус баһылыга Михаил Соров Таатта улууһа тыл, култуура күүскэ сайдыбыт түөлбэтэ буоларын тоһоҕолоон туран, бу фонтаннаах, кырасыабай тутуулаах искибиэр  нэһилиэк дьоно астына-дуоһуйа сынньанар, манна тэрээһиннэр, күрэстэр ыытыллар  сирдэрэ буолуоҕар эрэнэрин биллэрдэ.

edersaas.ru

+1
0
+1
0
+1
0
+1
0
+1
0
+1
0
+1
0