Араас үөрэххэ үөрэнэ сылдьар ыччаттар төрөөбүт дойдуларыгар тиийэн, бэйэлэрин сатабылларын биир дойдулаахтарын кытта үллэстэллэр. Ол курдук, Өймөкөөн улууһун Томтор нэһилиэгэр саха балаҕаныгар Нам педколледжын устудьуона Вера Готовцева кураанахтыы имитии ньыматыгар маастар-кылаас ыытта.
Бу туһунан Дарья Тихомирова кэпсиир: «Киһи кэрэхсиирэ, оскуола бастакы кылааһын үөрэнээччитэ Алина Слепцова эмиэ улахан дьону кытта тэҥҥэ үөрэнэ кэлбит. Кыысчаан бэрт дьаныардаах, ылсыбытын бүтэрэн тэйэр киһи буолан биэрдэ.
Саха балаҕана — өбүгэбит төрүт олоҕун эйгэтэ. Киһи эрэ ис кутунан ылынар дьиэтигэр үөрэтээччибит Вера Готовцева ыйан-кэрдэн биэрэн, бэрт холкутук быһааран, бириэмэбитин олох да билбэккэ хааллыбыт. Бары да ыйыталаһан, санаабытын үллэстэн, өссө да иис араас көрүҥүн чиҥэтэргэ, дьону интэриэстэринэн түмэргэ, дьарыктаах буолууну тэнитэн иһэргэ сүбэлэстибит.»
Чысхаан бу айар-тутар балаҕана Томтор нэһилиэгин култууратын дьиэтигэр сыһыарыллан үлэлиир. Дириэктэр Татьяна Бурцева салалтатынан манна араас тэрээһиннэр ыытыллаллар. Олохтоохтор биир үтүө күннэрэ сатабыллаахтык ааспытыгар Вера Готовцеваҕа махтаналлар.
Елена ПОТОЦКАЯ.