Өймөкөөн улууһун Томтор орто оскуолатын иһинэн үлэлиир ГУЛАГ историятын үөрэтэр Литературнай мусуой Арассыыйаҕа соҕотох маннык хайысхалаах үлэлээх оҕо тэрилтэтинэн биллэр.
edersaas.ru
Маннык ураты ис хоһоонноох мусуой быйыл тэриллибитэ 28 сылын бэлиэтиир. Кыраайы үөрэтэр мусуойу РФ үтүөлээх учуутала, Өймөкөөн улууһун бочуоттаах олохтооҕо Мария Боярова төрүттээбитэ. Кини үөрэнээччилэрин, «Поиск» куруһуок оҕолорун, кытта отучча сыл тухары бэлитиичэскэй репрессия сиэртибэлэрин, Өймөкөөн улууһугар тэриллэ сылдьыбыт отуттан тахса ГУЛАГ лааҕырдарын туһунан сүҥкэн үгүс матырыйааллары хомуйан үйэтиттилэр.
Репрессияҕа түбэспит дойду интеллигенцията, үөрэхтээх, айар талааннаах суруйааччылар ааттарын-суолларын тилиннэрэн, кинилэр тустарынан аймахтарын кытта суруйсууларын түмүгэр, Томтор оскуолатын иһинэн үлэлиир ГУЛАГ лааҕырдарын туһунан баай матырыйааллаах мусуой аҕыйах диэн, манна сылдьыбыт үтүмэн элбэх учуонай, турист бэлиэтиир. Өймөкөөн улууһа тымныы полюһунан биллэр буолан, манна араас омук дойдутуттан туристар тоҕуоруһа мусталлар. Кинилэр Мария Боярова тэрийбит ГУЛАГ лааҕырдарын туһунан кэпсиир мусуойун анаан ааттаан көрөн, сөҕөн бараллар.
Алтынньы 30 күнүн — дойду үрдүнэн бэлитиичэскэй репрессия сиэртибэлэрин кэриэстиир күнү Өймөкөөн улууһун олохтоохторо ханнык да балаһыанньаҕа хайаан даҕаны бэлиэтииллэр. Бу күн Н.М. Заболоцкай-Чысхаан аатынан Томтор орто оскуолатын учууталлара куйаар сибээһин нөҥүө дойду интеллигенциятын чаҕылхай бэрэстэбиитэлэ, физик, мусукаан, Өймөкөөн Томторугар ГУЛАГ лааҕырга сылдьыбыт Лев Термен туһунан видео-кэмпириэнсийэни ыыттылар.
Арассыыйа үтүөлээх учуутала бу ураты талааннаах киһи туһунан кэпсээбитин кэмпириэнсийэ кыттыылаахтара олус интэриэһиргээн иһиттилэр.
Тэрээһин түмүгэр кэмпириэнсийэ кыттыылаахтара Лев Сергеевич Термен 100 сааһыгар анаммыт киинэни көрдүлэр.
Саҥа тутуллубут таас оскуолаҕа ГУЛАГ историятын үөрэтэр Литературнай мусуойга биир сырдык, ыраас, киэҥ-куоҥ хоһу биэрэн, бу түмэлгэ, төһө да сыстыганнаах дьаҥ бүрүүкээн турдар, бүгүҥҥү суолталаах күнү бэлиэтээн аастылар.
Елена ПОТОЦКАЯ, «Саха сирэ» хаһыат, edersaas.ru
Хаартыска — Н.М. Заболоцкай -Чысхаан аатынан
Томтор орто оскуолатын инстаграмыттан.