Томпо оройуонугар ыраах учаастактарга баар табаһыттар болдьоҕун иннинэ куоластыыллар.
Айылҕатын усулуобуйатынан уонна былыргыттан хаалбыт үгэһи салҕаан, тополинайдар сүрүн дьарыктара — таба иитиитэ. Манна сылы эргиччи үлэлиир табаһыттар ыраах сиринэн тайыыллар. Онон РФ Төрүт Сокуонугар көннөрүүлэри киллэриигэ болдьоҕун иннинэ куоластаатылар диэн улуус хаһыата иһитиннэрэр.
Бэс ыйын 23 күнүгэр «Полярные авиалинии» бөртөлүөтэ Хаандыга аэропордуттан суола-ииһэ суох ыраах сытар учаастакка көппүт.
Бөлөх састаабыгар: территориятааҕы быыбардыыр хамыыһыйа чилиэнэ Винокуров Александр Львович, «Томпо национальнай (эбээн) нэһилиэгэ» Тополинай с. быыбардыыр хамыыһыйа бэрэссэдээтэлин солбуйааччы Погодаева Ольга Петровна, чилиэн Погодаева Раиса Петровна, наблюдатель Попов Гавриил Гаврильевич, полиция сотруднига Умалатов Карим Шахболатович, «Томпо» ТПК (фактория) дириэктэрэ Тарабукин Анатолий Лазаревич уонна кэрэспэдьиэн Любовь Моторина сылдьаллар.
Бастаан М.С.Лебедев аатынан көс олохтоох родовой общинаҕа (КСРО) тиийбиттэр. Туундара үлэһит дьоно ыраахтан тиийбит ыалдьыттары үөрэ-көтө көрүстүлэр уонна быыбарга куоластарын биэрдилэр. Быыбардааччылар Конституцияҕа уларытыыларга ордук дьиэ кэргэҥҥэ, оҕо-аймахха, Хотугу төрүт олохтоох аҕыйах ахсааннаах норуоттар култуураларын, үгэстэрин харыстааһыҥҥа болҕомто күүһүрэрин ордук сэргииллэрин, сэҥээрэллэрин эттилэр. Хас биирдии ыстаадаҕа сылдьар бириэмэ чопчу, онон куоластааһын туох да тардыллыыта суох салҕанан иһэр. Маныаха кадр исписэлииһэ Айталина Баишева «Томпо» ТПК (Ф) салалтатыгар биллэрэн, бастакы уонна тохсус ыстаада табаһыттара тохтоон олорор сүрүн сирдэригэр куоластыыр күннэригэр баар буолаллара хааччылынна. Ил Түмэн дьокутаата Виктор Лебедев төрөппүттэрэ Николай Христофорович уонна Елена Николаевна олорор, үлэлиир сирдэрэ айылҕатынан абылаата. Манна куоластааһын көхтөөхтүк барда диэн иһитиннэрбиттэр.
Болдьоҕун иннинэ куоластааһын түмүгүнэн, испииһэккэ киирбит быыбардааччылартан 28 киһи куолаһын биэрбит. Территориятааҕы быыбардыыр хамыыһыйа бэрэссэдээтэлэ Васильев Александр Иванович иһитиннэрбитинэн, өссө биир учаастакка бэс ыйын 25 күнүгэр, Теплай күлүүс нэһилиэгиттэн көтүөхтээхтэр.
+1
+1
+1
+1
+1
+1
+1