Бэрээдэк Уопсастыба

Томпоҕо түөрт киһи ууга былдьаныытыгар буруйдаахха суут бириигэбэрэ таҕыста



Бу быһылаан былырыын күһүөрү кыһын Томпо улууһугар буолбута — Амма өрүскэ түөрт киһи былдьаммыта… Холуобунай дьыала тэриллибитэ, ол суукка көрүллэн бүтэн, бириигэбэр тахсыбытын туһунан СӨ Борокуратууратын пресс-сулууспата иһитиннэрдэ.

edersaas.ru

Суут быһаарбытынан, 2018 сыл алтынньы 16 күнүгэр, уу суола сабыллыбыт кэмигэр, сууттанааччы харчы оҥороору, дьону таһар көҥүлэ уонна быыһыыр сэлиэччиктэрэ суох эрээри, «Вельбонт-45ML» диэн мотуордаах оҥочотугар 8 киһини олордубут. Амма өрүһүнэн Кэскил сэлиэнньэтиттэн Кириэс Халдьаайыга диэри тиэрдээри.

Маныаха бу оҥочоҕо биэс эрэ киһи олороро көҥүллэнэр эбит. Эбиитин «Yamaha-70» диэн оҥочо мотуора состоруулаах айаннаабыт.

Ол иһэн, сууттанааччы тула мөлтөхтүк көстөр усулуобуйаҕа айанын бытаардыбакка, сэрэҕэ суоҕуттан, Алдан өрүс уҥа кытылыгар тиийэн сааллыбыт. Ол түмүгэр, оҥочо түҥнэстэн, түөрт киһи ууга былдьаммыт.

Суут кинини РФ Холуобунай кодексатын 238-с ыст. 3-с чааһынан, ол эбэтэр, куттал суох буолуутугар эппиэттээбэт өҥөнү толорон, сэрэҕэ суохтан иккиттэн элбэх киһини өлүүгэ тиэрдии иһин буруйдааҕынан билинэн, 5 сылга уопсай эрэсиимнээх холуонньаҕа көҥүлүн быһарга уурбут.

Бириигэбэр сокуоннай күүһүгэр киирэ илик.

Биһиги корр., «Саха сирэ» хаһыат, edersaas.ru

Хаартыска: интэриниэттэн.

0
0

Добавить комментарий