Быйыл Томпо оройуонугар төрөөбүт оҕолорго эбии 25 тыһыынча солкуобайы биэрэргэ оройуон баһылыга Яков Степанов быһаарбыта. Кулун тутар 30 күнүнээҕи туругунан, оройуоҥҥа 18 оҕо күн сирин көрдө. Бу миэрэ Томпо оройуонугар демографическай балаһыанньаны тупсарар, дьиэ кэргэттэри көҕүлүүр, көмөлөһөр сыаллаах.
Ол курдук, 25 тыһыынча солкуобай суумалаах сэрстипикээти ыларга маннык ирдэбиллэрдээх:
—— 2022 сыл тохсунньу 1 күнүттэн ахсынньы 31 күнүгэр диэри оҕоломмут ийэлэр;
— Томпо оройуонугар бырапыыскалаах ийэлэр;
— ийэлэрэ өлбүт буоллаҕына, аҕа (эбэтэр, оҕону иитэр атын аймах) ылар бырааптаах.
Маны сэргэ, быйыл төрөөбүт оҕолоох дьиэ кэргэттэр Саха АССР 100 сылыгар анаммыт “100 сыл оҕолоро” хапытаалы ылаллар. Оттон өрөспүүбүлүкэҕэ биллэриллибит Ийэ сылыгар улуустар миэстэтигэр ийэлэри өйүүллэрэ, оҕо төрүүрүн көҕүлүүллэрэ хайҕаллаах дьыала.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru