Бүгүн «ОДьКХ» ГУП генеральнай дириэктэрэ Виктор Омуков Томпону таһынан ханнык улуустарга уһаппыттарын, быйылгы оттук сезонун түмүктэрин уонна кэлэр сезоҥҥа туох үлэ ыытыллыаҕын кэпсээтэ.
Александр ТАРАСОВ, «Саха сирэ» хаһыат, https://edersaas.ru
«Быйылгы оттук сезона 26 филиалбытыгар уонна икки учаастакпытыгар этэҥҥэ ааста. Түгэнинэн туһанан, тэрилтэ үлэһиттэригэр барҕа махталбын тиэрдэбин. Халыма улуустарын филиалларын үлэлэрин ордук чорботон бэлиэтиибин. Былырыын алтынньы, сэтинньи ыйдарга нуорманы хас эмэ төгүл куоһарар хаар түспүтүн уонна кыһыҥҥы суол хойут аһыллыбытын үрдүнэн нэһилиэнньэни тохтоло суох итиинэн хааччыйбыттара. Ыраах сытар нэһилиэнньэлээх пууннар хочуолунайдарыгар оттук кэмигэр тиэрдиллибитэ. Билиҥҥи туругунан, ити улуустарга кэлэр кыһыҥҥы суол аһыллыар диэри тиийэр оттук баар», – диэн Виктор Омуков кэпсээтэ.
«ОДьКХ» ГУП уу суолунан таһаҕаһы тиэйиини саҕалаата. Дьабаракы Хайаттан 8 тыһ туонна таас чох суудуналарга тиэллэн, Амма улууһун хочуолунайдарыгар тиэрдиллиэҕэ. Быйыл уу суолунан 415,7 тыһ туонна таас чох, сиикэй ньиэп уонна конденсат оттук таһыллыаҕа.
Быйыл өрөспүүбүлүкэ үрдүнэн өрөмүөҥҥэ уонна хочуолунайдары саҥардыыга 603 мөл. солк көрүллүбүтүнэн, былаан быһыытынан, 90 эргэ хочуол, 55 горелка, 227 носуос уларытыллыахтара, 73,2 км уһуннаах ититэр ситим өрөмүөннэниэҕэ. Итини тэҥэ, 1782 чааһынай дьиэни киин ититэр ситимҥэ холбуурга усулуобуйа оҥоһуллуоҕа.
Билигин Халыма өрүс халааннаан, Орто Халыма улууһун Березовкатыгар хочуолунай ууга баран турар. «Өссө ыам ыйын саҥатыгар халаан уутун этэҥҥэ аһардыыга оробуочай бөлөх тэриллибитэ, – диэн Виктор Викторович кэпсиир. – Ууга барыан сөптөөх эбийиэктэр эрдэ чуолкайданан бэрэбиэркэ барбыта. Бүгүн Березовкаҕа 1 №-дээх хочуолунай ууга баран турар. Биллэн турар, үлэлээбэт. Уу барда даҕаны, ууга барбыт дьиэлээхтэри итиинэн хааччыйар сыалтан хочуолунайы үлэлэтиэхпит. Иккис хочуолунайы уу ылар куттала суох. Бу эбийиэк электростанцията оскуоланы уонна чааһыйа ыаллары уотунан хааччыйар».
Күн-дьыл туругунан сибээстээн, Чурапчы, Үөһээ Бүлүү, Мэҥэ Хаҥалас, Горнай, Өлүөхүмэ, Сунтаар уонна Томпо улуустарыгар оттук сезона 10-15 күн уһатыллан, хочуолунайдар итиини биэриэхтэрэ.
Александр ТАРАСОВ, «Саха сирэ» хаһыат, https://edersaas.ru