Томпо, Өлүөхүмэ, Ньурба улуустара оту Үөһээ Бүлүүттэн атыылаһыахтара
Сарсын, бэлиэр, атырдьах ыйын 1 күнэ буолуоҕа. Айылҕа суокунунан сайыммыт күһүнүнэн солбуллуоҕа. Өрөспүүбүлүкэ үрдүнэн от хампаанньата күүскэ бара турар эрээри, үүнүү быстар мөлтөҕө биллэр. Аны туран, ойуур баһаардара туран, тиирбэҕэлэһэн оттуох да дьоҥҥо улахан мэһэйи үөскэтэр.
Онон аны кыһын хаһаайыстыбалар, биирдиилээн да ыал отунан кыһарыйтарбаттарын хааччыйар инниттэн өрөспүүбүлүкэ тас өттүттэн оту атыылаһан аҕалыы боппуруоһа сытыытык турда. Онно аналлаах үлэ саҕаланна. Холобур, Уус Алдан баһылыга Алексей Федотов салайааччылаах бөлөх бу күннэргэ Амур уобалаһыгар тиийэн, быйылгы кыстыкка оту атыылаһыыга үлэни ыыта сылдьар. СӨ Бырабыыталыстыбата оту тиэйэн аҕалыы төлөбүрүн уйунар.
Санатар буоллахха, маннык хартыына биһиги өрөспүүбүлүкэбитигэр 2012-2013 сс. тахса сылдьыбыта биллэр. Амур уобалаһыттан 3200 туонна от атыылаһыллан, өрөспүүбүлүкэ улуустарыгар тарҕатыллыбыта.
Сергей Иванов, Үөһээ Бүлүүтээҕи тыа хаһаайыстыбатын управлениетын салайааччыта:
—Улууска от үлэтэ этэҥҥэ барар. Сыллааҕы былааммыт 24 тыһ. туонна буоллаҕына, 22 тыһ. туоннанан холкутук кыстыыбыт. Бүгүҥҥү туругунан, 7 тыһ. туонна от ходуһаҕа охсулунна, 5 тыһ. туонна кэбиһилиннэ. Нэһилиэктэрбититтэн Туобуйа уонна Быракаан уустук балаһыанньалаах, олус курааннаан, от аанньа үүммэтэ. Бу кыһалҕаны улуус иһигэр быһаарыахпыт. Аны күһүҥҥэ диэри этэҥҥэ оттуохпут диэн эрэнэбит, атын сиртэн от атыылаһар кыһалҕа тириэ суоҕа.
Билиҥҥи туругунан, Томпо, Өлүөхүмэ, Ньурба улуустара аны кыһын от атыылаһарга сайаапкаларын түһэрдилэр. Онон нэһилиэктэрбит атыыга анаан оттуурга бэлэмнэр. Ньурбалар ордор сирбитигэр оттуу кэлиэхтэрин баҕараллар, ол бу күннэргэ чуолкай биллиэҕэ. Томполор, өлүөхүмэлэр өрөспүүбүлүкэ тас өттүттэн от ылыахтарын кэриэтэ биһигиттэн кэлэн атыыласпыттара быдан ордук.
edersaas.ru