Олунньу 4 күнүгэр Саха сирин вице-премьерэ Кирилл Бычков салалтатынан өрөспүүбүлүкэ судаарыстыбаннай былааһын ситэриилээх уорганнарын 2018 сыллааҕы үлэтин отчуота Алдан оройуонун Томмот куоратыгар ыытылынна.
edersaas.ru
Кирилл Бычков томмотторго бырабыыталыстыба ыытар үлэтин сүрүн түмүктэрин билиһиннэрдэ. Министиэристибэлэр бэрэстэбиитэллэрин кытта ыйытыыларга хоруйдаата. Үгүстэр 2019-2024 сылларга саахалланар туруктаах дьиэлэртэн дьону көһөрүү регионнааҕы аадырыстаах бырагырааматыгар уонна Уһук Хоту дойду оройуоннарыттан көһөн барыы бырагырааматыгар сыһыаннаах ыйытыылары биэрдилэр.
2018 сылга Алдан оройуона саахалланар туруктаах хаарбах дьиэттэн көһөрүү бырагырааматын бастакы түһүмэҕин ситиһиилээхтик түмүктээбитэ. Алдан оройуонун 751 олохтооҕо саҥа кыбартыыраларга көспүтэ, 346 хаарбах дьиэ көтүрүллүбүтэ, 12 элбэх кыбартыыралаах дьиэ тутуллубута.
Бырагыраама иккис түһүмэҕэр (2019-2024 сылларга) оройуон 180 тыһ. кв. м иэннээх 550 саахалланар туруктаах дьиэни көһөрөргө эрдэттэн сайаапкалаабыта. Саахалланар туруктаах олорор дьиэ фондата АЯМ тутааччыларыгар быстах кэмҥэ анаан тутуллубут Солнечнай уонна Синегорье микрооройуонугар баар.
Томмот олохтоохторугар тутуу миниистирэ Павел Аргунов быһаарбытынан, сууллар кутталлаах дьиэлэр бастакы уочарат көһөрүллүөхтэрэ. Бас билээччилэргэ толуйуллар төлөбүрдэргэ тохтоотоххо, ити ырыынак сыанатынан оҥоһуллуоҕа. Томмот олохтоохторо ону тэҥэ сууллар кутталлааҕынан билиниллибит муниципальнай дьиэ 100 квадратнай миэтэрэттэн тахса иэннээх буоллаҕына, икки кыбартыыраны ылыахха сөп дуо диэн ыйыттылар. Сокуоҥҥа олоҕуран, итинник табыллыбат эбит.
Оҕолорго аналлаах спортсаала туһунан ыйытыыга Алдан оройуонун баһылыга Северин Поздняков хоруйдаата. Билигин үлэлии турар спортсаала тымныы уонна хаачыстыбата суох тутуллубут. Оройуон баһылыга быйыл саҥа сааланы тутарга үп суоҕун этэн туран, олохтоох бүддьүөттэн дьиэни сылытыыга үп көрүллүөҕэ диэтэ.
Олохтоохтор өссө биир кыһалҕалаах эбийиэк – элбэх кэһиилэрдээх тутуллубут муусука оскуолатын туһунан ыйыттылар. Баһылык этэринэн, бэдэрээтчити кытта сууттаһыы түмүктэнэн эрэр уонна тутааччы муниципальнай бүддьүөт эбийиэги тутууга ыыппыт ороскуотун толору толуйуо диэн эрэнэр. Муусука оскуолата көтүрүллэн, саҥаны тутуохпут диэн Поздняков эрэннэрдэ.
Кини Алдан оройуонугар Экология сыла биллэриллибитинэн, олохтоохтору тулалыыр эйгэни харыстыырга ыҥырда.
Түмүккэ томмоттор олохтоох уонна өрөспүүбүлүкэ былаастарыгар махтаннылар.
Саха Өрөспүүбүлүкэтин Ил Дарханын уонна Саха Өрөспүүбүлүкэтин бырабыыталыстыбатын пресс-сулууспата