Өрөспүүбүлүкэ арҕаа, соҕуруу уонна хотугулуу-илиҥҥи улуустарын олохтоохторо кэлиҥҥи сылларга федеральнай суолларынан үгүстүк айанныыллар.
edersaas.ru
Онон аара «чайнойдар» дэнэр кафеларга тохтоон аһаан, «көҕүрэттэн», алаадьы ууран, суолларын аһатан ааһаллар. Элбэхтик айанныыр дьон тохтобул сиргэ киирэн баран, бастатан туран, ыраас соттор, мыыла, суунар уу баарын бэлиэтии көрөллөр. Дьэ, ол кэннэ аска болҕомто ууруллар. Хомойуох иһин, киин сиртэн төһөнөн ыраатаҕын да, сыана да ыараан барар, тохтоон аһыыр сир да өҥө оҥорор хаачыстыбата мөлтүүр.
Онон, туох да диэбит иһин, хас биирдии «чайной», кафе, остолобуой — федеральнай суол ааһар улуустарын сиэркилэлэринэн буолаллар. Үчүгэй «чайнойга» сырыттыҥ да, бу улуус туһунан үтүө өйдөбүл хаалар. Оттон кирдээх соттордоох, мыыла диэни билбэтэх, уулааҕар баһыыба умывальниктаах аһыыр сир — улууһун туһунан мөкү санааны үөскэтэрэ баар суол.
Баҕар, киин куораттан чугас турар буолан эбитэ дуу, урбаанньыттарын олохтоох толкуйдарын кытта сибээстээҕэ эбитэ дуу, бу өттүгэр Мэҥэ Хаҥалас Төҥүлүтүн «чайнойдара», кафелара инники күөҥҥэ сылдьаллар.
Соторутааҕыта биир кафе олох соһутта. Ол курдук, тэрилтэ салалтата бэртээхэй итии туалет тутан, бу маннык сайдыыга өтөр тиийбэт инибит дии саныыр айанньыттарга бэртээхэй бэлэҕи оҥорбут!
Буолаары буолан, буор босхо. Эчи, ырааһа, сылааһа — тэрилтэ урбаанньыттара дьон иннигэр үлэлииллэрэ көстөр.
Биллэн турар, 21-с сайдыылаах үйэҕэ хоту дойду дьоно маннык тупсаҕай туалеттанар кэммит кэллэ. Бу туалет таһырдьа тымныйаатын кытта быйыл алтынньы ортотугар үлэҕэ киирбит.
Таҥас ыйыыр көхөлөөх, итии уулаах, мыылалаах — барыта айанньыкка үтүө сыһыан холобура.
«Киртитимэҥ, табахтаамаҥ!» — диэн суруктаах эрээри, бу бэйэлээҕи ким сыыһырда туруой? Чаас буола-буола туалеты киирэн хомуйан иһэллэр эбит.
Урбаанньыттар бэйэ-бэйэлэриттэн үөрэнэн, холобур ылан, бу маннык итии, ыраас, толору хааччыллыылаах туалеттары улуус «чайнойдарын» аайы туталлара буоллар, айанньыттар төһөлөөх абыраныахтара этэй!
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ