Арассыыйа спордун миниистирэ Павел Колобков 2020 сылга Токиоҕа ыытыллар Олимпийскай оонньууларга кыттыахтаах дойду сүүмэрдэммит хамаандатын иннигэр туруоруллар соруктар туһунан кэпсээтэ.
ССТА-ҕа биэрбит интервьютугар Павел Колобков, хамаанда 2020 сыллааҕы Олимпиадаҕа былаан быһыытынан бэлэмнэнэр, туруоруллубут сыалы-соругу толорон, үс бастыҥ иһигэр киириэҕэр саарбаҕалааһын суох диэтэ, ону ситиһиигэ бары ис кыахтар баалларын эттэ.
Ааспыт, 2016 сыллаахха буолбут Рио-де-Жанейротааҕы Олимпийскай оонньууларга мэтээл ахсаанынан Арасссыыйа сүүмэрдэммит хамаандата Кытай, Великобритания, АХШ кэнниттэн төрдүс миэстэҕэ тахсыбыта.
Манна даҕатан аҕыннахха, 2018 сыл ахсынньытыгар буолбут Спорт министиэристибэтин кэллиэгийэтин киэҥ ыҥырыылаах мунньаҕар Токиотааҕы Олимпиадаҕа кыайыыны ситиспит Арассыыйа спортсмена 4 мөлүйүөн солкуобайынан биһирэниэҕин, оттон үрүҥ көмүс уонна боруонса мэтээллэри ылбыттар туһааннааҕынан 2,5 уонна 1,7 мөлүйүөнү ылыахтарын иһитиннэрбиттэрэ.
XXXII сайыҥҥы Олимпийскай оонньуулар 2020 сыл от ыйын 24 – атырдьах ыйын 9 күннэригэр Токиоҕа ыытыллыахтара.
Роман ПОПОВ, «Саха сирэ» хаһыат, edersaas.ru
Хаартыска интэриниэттэн ылылынна