Япония киин куоратыгар, Токиоҕа, 2020 сыллаахха ыытыллыахтаах ХХХII сайыҥҥы Олимпийскай оонньууларга диэри хас күн хаалбытын официальнайдык ааҕыы саҕаланна.
Тэрийээччилэр Олимпиада өрөгөй ырыатын билиһиннэрдилэр. Бу гимн 1964 сыллаахха Токиотааҕы Олимпиадаҕа толоруллубут “Tokyo Gorin Ondo” диэн ырыаҕа олоҕуран айылынна.
Маны сэргэ бүтүн дойду үрдүнэн Telework Day аахсыйа ыытылынна. Бу күн 900-тэн тахса хампаанньа үлэһиттэрэ дьиэлэригэр олорон үлэлээтилэр. Күн тахсар дойдутун олохтоохторо Олимпийскай оонньуулар кэмнэригэр уопсастыбаннай тырааныспар ноҕуруускатын аччатыыга туһуламмыт маннык тэрээһиннэри сыллата тэрийэн ыытыахтара.
Санатан эттэххэ, ХХХII сайыҥҥы Олимпийскай оонньуулары ыытар быраабы Токио Мадрид (Испания) уонна Стамбул (Турция) куораттары кытта күрэстэһэн ылбыта. Икки түһүмэҕинэн барбыт куоластааһын түмүгэр, Токио Стамбул куораты 60:36 ахсаанынан хотон кыайыылаах тахсыбыта. Онон Олимпийскай кэмитиэт 2013 сыл балаҕан ыйын 7 күнүгэр Буэнос-Айреска (Аргентина) буолбут 125-с сессиятыгар Токио (Япония) ХХХII сайыҥҥы Олимпийскай оонньуулар киин куораттарынан биллэриллибитэ.
Роман ПОПОВ, “Саха сирэ” хаһыат, edersaas.ru