«Тойота-суксид» массыынаны билбэт киһи, арааһа, суоҕа буолуо. Саха сирин тыйыс усулуобуйатыгар оруобуна барсар диэн дьон сөбүлүүр. Дэлэҕэ «рабочая лошадка» диэхтэрэ дуо? Иккиһинэн, сыаната да оннук-айылаах ыарахан буолбатах.
Бу тимир көлө туга мөлтөх эбитий диэн ыйытыыга, автоэлектрик Дьулус Кучаров маннык эппиэттээтэ: «Кырдьык, бары өттүнэн бөҕө массыына, мээнэ хаппырыыстаабат. Биллэн турар, кэмигэр мотуор, коробка арыыларын, фильтрдэри уларытан, көрүнэ сылдьыллыахтаах. Ааспыкка биир массыынаны аҕаллылар ээ! Мотуорун арыытын кэмигэр уларыппатахтара биллэрэ. Поршеннара, кольцалара бүтээхтээбит этэ.
«Тойота-суксид» ходобуойа бэрт судургу оҥоһуулаах буолан, оҥорорго, саппаас чаастарын уларытар бэрт кэбэҕэс. Тиэхиньикэҕэ сыстаҕас киһи бэйэтэ аа-дьуо уларытар-тэлэритэр кыахтаах. Бу тимир көлө фаратын кэбирэхтик оҥорбуттар. Үксүн уоту холбуур гитаралара алдьанан моһуоктуур. Дьэ, бу чааһын тоҕо эрэ мөлтөхтүк оҥорбуттар. Киһи бэйэтэ хасыһан оҥороро сыыһа. Анал электриктэргэ оҥорторор үчүгэй.
Уот-күөс тиэмэтин таарыйбычча этиэҕи баҕарыллар, Кытайга оҥоһуллубут предохранителлэри туһанымаҥ диэн. Үчүгэй предохранитель наадалаах кэмҥэ быстыахтаах. Кытайга оҥоһуллубут предохранитель быстыбакка, боруобаттар итийэн ууллан, иэдээни таһаарыахтарын сөп. Ханна эрэ самыкаанньа үөскээтэ даҕаны, ити тэрил быһа барыахтаах», – диэн быһааран биэрдэ.
Александр ТАРАСОВ, «Саха сирэ» хаһыат, https://edersaas.ru