Үлэтиттэн уһуллубут эбэтэр салайааччытыгар хом санаалаах киһи, мунньуллубута биирдэ тоҕо баран, өс ситиһиэн сөп. Муома улууһугар биир оннук быһылаан бу дьыл балаҕан ыйыгар тахсыбыт.
Бу дьыала суут мунньаҕар көрүллэн, бириигэбэр тахсыбытын туһунан СӨ Борокуратууратын пресс-сулууспата иһитиннэрдэ.
Суут быһаарбытынан, бу күһүн Муома улууһун Хонуу сэлиэнньэтин 25 саастаах олохтооҕо итирэн баран, булт саатын ылан, салайааччытын дьиэтигэр барбыт. «Үлэтигэр хойутуурун иһин тойоно сэмэлээбитин, өссө бириэмийэтин быспытын иһин» ол аата быһаарса-аахса диэн тиийбит.
Ол тиийэн, тойоно тэлгэһэтигэр сылдьарын көрөн, иитиилээх саатынан тирээн туран, быһаарсарга ыҥырбыт. Салайааччыта олоҕор уонна доруобуйатыгар куттал дьиҥ-чахчы суоһуурун өйдөөн, дьиэтигэр киирэн саспыт. Салгыы туох буолбутун туһунан иһитиннэрии суох.
Суут мунньаҕар сууттанааччы буруйун толорун билиммит уонна кэмсиммит.
Суут эдэр киһини РФ Холуобунай кодексатын 119-с ыст. 1 чааһынан, ол эбэтэр, өлөрөрүнэн суоһурҕаныыга буруйдааҕынан билинэн, 200 чаас булгуччулаах үлэҕэ уурбут.
Бириигэбэр сокуоннай күүһүгэр киирбит.
Биһиги корр., «Саха сирэ» хаһыат, edersaas.ru
Хаартыска: интэриниэттэн.