Эдуард Новиков “Тойон кыыл” киинэтэ муус устар 19-26 күннэригэр ыытыллыбыт Москватааҕы норуоттар икки ардыларынааҕы киинэ бэстибээлин кыайыылааҕынан билинилиннэ. Быйылгы бэстибээл сүрүн куонкуруһугар Арассыыйа, Италия, Турция, Франция, Канада о.д.а. дойдулар кинематографистарын үлэлэрэ сүүмэрдэммиттэрэ.
edersaas.ru
Бэҕэһээ Москватааҕы түөрт уонус үбүлүөйдээх норуоттар икки ардыларынааҕы киинэ бэстибээлэ кыайыылаахтарын ааттаталаата. Онно Саха сириттэн кыттыбыт “Тойон Кыыл” хартыына (режиссер Эдуард Новиков, оператор Семён Аманатов, сценарист Семён Ермолаев) Москватааҕы норуоттар икки ардыларынааҕы киинэ бэстибээлин кыайыылааҕынан билинилиннэ.
“Арассыыйа” тыйаатырга буолбут бэстибээл үөрүүлээх сабыллыытыгар норуоттар икки ардыларынааҕы жюри бэрэссэдээтэлэ Паоло Дель Брокко (Италия) бэстибээл сүрүн бирииһин – Кыһыл көмүс Георгийы “Тойон Кыыл” продюсеругар Дмитрий Шадриҥҥа туттарда.
Ыспыраапка
Москватааҕы норуоттар икки ардыларынааҕы киинэ бэстибээлэ аан дойдуга биир аҕа саастаахтарынан буолар. 1935 сыллаахха ыытыллыбыт бастакы бэстибээл бэрэссэдээтэлинэн Сергей Эйзенштейн үлэлээбитэ. Онно сүрүн куонкурус кыайыылааҕынан ини-бии Васильевтар “Чапаев” киинэлэрэ ааттаммыта.
1959 сыллаахтан Москватааҕы бэстибээл сыллата ыытыллар. Күн бүгүн киинэ бэстибээлин бэрэсидьиэнинэн режиссер Никита Михалков буолар.
Роман Попов, “Саха сирэ” хаһыат, edersaas.ru