Саха киинэтин режиссера Эдуард Новиков “Тойон Кыыл” драматическай хартыыната Монреаллаҕы киинэ бэстибээлин биир сүрүн бирииһин ылла.
Биллэрин курдук, бу киинэ атырдьах ыйын 23 — балаҕан ыйын 3 күннэригэр Канадаҕа ыытыллыбыт 42-с Монреаллааҕы киинэ бэстибээлин сүрүн куонкурустаһар бырагырааматыгар талыллан ылыллыбыта. Онон, “Тойон Кыыл” 18 дойдуттан кыттыбыт 23 хартыынаны кытта бииргэ толору метражтаах киинэлэр категорияларыгар киирдэ уонна түмүккэ – уус-уран кылаатын иһин бирииһи ылла! Бу туһунан СИА yakutmovie.ru. сигэнэн, иһитиннэрэр. Бу – улахан ситиһии! Ол аата, саха киинэтэ атыттарга маарыннаабат, бэйэтэ ураты, истиҥ буочардаах!
Санатан эттэххэ, “Сахафильм” ГНК “Тойон Кыыл” киинэтэ (режиссер Эдуард Новиков, продюсер Дмитрий Шадрин), аан маҥнай II Чукоткатааҕы норуоттар икки ардыларынааҕы арктическай киинэ бэстибээлин куонкуруһугар, Выборга “Окно в Европу” сүрүн бырагырааматыгар, Казахстаҥҥа “Евразия” киинэырыынагар көрдөрүллүбүтэ. Быйыл от ыйыгар “Тойон Кыыл” Ессентуки “Хрустальный источник” куонкуруһугар бастыҥ ааты ылбыта. Оттон саха киинэтин саамай үрдүк наҕараадатынан, 40-с Москватааҕы норуоттар икки ардыларынааҕы киинэ бэстибээлин Гран-при хаһаайынын дьоһун аатын ылыыта буолар.
Болҕойуҥ, “Тойон Кыыл” киинэ сотору прокатка тахсар — балаҕан ыйын 19 күнүттэн бары киинэ-тыйаатырдарыгар көрдөрүллүөҕэ.
Татьяна Маркова.