Ыам ыйын 18-гар Емельян Ярославскай аатынан Саха түмэлигэр «Музейный нон-стоп» акция ыытылынна. Түмэл аан дойдутааҕы күнүгэр анаммыт тэрээһин чэрчитинэн 40-с Москватааҕы норуоттар икки ардыларынааҕы киинэ бэстибээлигэр сүрүн бирииһи ылбыт «Тойон Кыыл» киинэ айар бөлөҕүн кытта көрсүһүү буолла.
«Тойон Кыыл» туруорааччы режиссера Эдуард Новиков, иккис режиссера, «Сахафильм» продюсера Любовь Борисова, сүрүн оруолу толорбут, Саха Өрөспүүбүлүкэтин үтүөлээх артыыһа Зоя Попова, «Сахафильм» звукорежиссера Иннокентий Сивцев хартыынаны хайдах уһулбуттарын кэпсээтилэр, киинэни сэргээччилэр ыйытыыларыгар хоруйдаатылар.
Мустубут дьон айар бөлөх кыттыылаахтарын үрдүк наҕарааданан истиҥник эҕэрдэлээтилэр, махтаннылар, айымньылаах үлэни, саҥа ситиһиилэри баҕардылар.
Роман Попов, «Саха сирэ» хаһыат